एकलहरे येथील चौकात भरधाव पिकअप उलटला

मंचर, ता. १९ : पुणे- नाशिक राष्ट्रीय महामार्गावर एकलहरे (ता. आंबेगाव) येथील मुख्य चौकात गुरुवारी (ता. १९) दुपारी भरधाव आलेली पिकअप गाडी उलटली. या अपघातात चालक गाडीमध्ये अडकून पडला होता.
पिकअप (क्र. एमएच-१४-जिओ-२३९४) मंचरच्या दिशेने येत असताना एकलहरे चौकात असलेल्या गतिरोधकावर आदळल्याने चालकाचा तोल सुटला. त्यामुळे गाडी उलटली. चालक राम गणेश छोटेलाल (वय २५, रा. देवरी, ता. देवघर, मध्य प्रदेश, सध्या रा. कळंब-एकलहरे) हे गाडीमध्ये अडकले होते. त्यांना बाहेर काढण्यासाठी भीमाशंकर सहकारी साखर कारखान्याचे उपाध्यक्ष ॲड. प्रदीप वळसे पाटील, बाबासाहेब खालकर, दिलीप लोखंडे आणि इतर स्थानिक नागरिकांनी तत्परता दाखवून तत्काळ मदत केली. चालकाच्या पायाला व हाताला जखमा झाल्या असून, ते अत्यंत घाबरलेल्या अवस्थेत होते. त्यांना धीर देत तत्काळ मंचर येथील एका खासगी रुग्णालयात उपचारासाठी दाखल करण्यात आले. दरम्यान, पलटी झालेली गाडी बाजूला काढून महामार्गावरील वाहतूक काही वेळाने पूर्ववत करण्यात आली.
एकलहरे चौकात बसवलेल्या गतिरोधकाच्या दक्षिण बाजूने ‘वाहने सावकाश चालवा’ असा इशारा देणारे फलक लावण्याची मागणी कळंब येथील वाहतूक व्यावसायिक दत्ता वर्पे यांनी केली आहे.