गावडेवाडीला संत गाडगेबाबा ग्राम स्वच्छता पुरस्कार

मंचर, ता. २३ : आंबेगाव तालुक्यातील आदर्शगाव गावडेवाडी ग्रामपंचायतीने पुणे जिल्हास्तरीय संत गाडगेबाबा ग्रामस्वच्छता अभियान २०२३-२४ मध्ये प्रथम क्रमांक पटकावला आहे. या कामगिरीबद्दल गावडेवाडी ग्रामपंचायतीला जिल्हास्तरीय पुरस्कार देण्यात आला. हा पुरस्कार ग्रामविकास, पंचायतराज मंत्री जयकुमार गोरे, पुणे विभागाचे विभागीय आयुक्त डॉ. चंद्रकांत पुलकुंडवार आणि जिल्हा परिषदेचे मुख्य कार्यकारी अधिकारी गजानन पाटील यांच्या हस्ते रविवारी (ता. २२) प्रदान करण्यात आला.
विभागीय आयुक्त कार्यालय, पुणे येथे पुरस्कार वितरण झाले. संत गाडगेबाबा ग्राम स्वच्छता अभियान अंतर्गत राष्ट्रसंत तुकडोजी महाराज ग्राम स्वच्छता अभियान स्पर्धेत आंबेगाव तालुक्यात प्रथम क्रमांकाचे ६० हजार रुपये रकमेचे पारितोषिक जिंकून आदर्शगाव गावडेवाडी ग्रामपंचायतीने जिल्हा पातळीवर प्रवेश केला. तेथे प्रथम क्रमांक प्राप्त करून सहा लाख रुपये रक्कमेचा धनादेश आणि प्रमाणपत्र पटकाविले आहे. ग्रामपंचायतीने विभागीय पातळीवर होणाऱ्या स्पर्धेत प्रवेश केला असल्याची माहिती सरपंच विजय गावडे यांनी दिली.
गावडे म्हणाले, ‘‘संत गाडगेबाबा ग्रामस्वच्छता अभियान गावात यशस्वी करण्यासाठी ग्रामपंचायत सदस्य, कर्मचारी व ग्रामस्थांची मोलाची साथ मिळाली. गटविकास अधिकारी प्रमिला वाळुंज, विस्तार अधिकारी रंगनाथ हुजरे व पंकज चौधरी यांचे मार्गदर्शन मिळाले.’’