पाच आरोग्य केंद्रांच्या विस्तारासाठी निधी मंजूर

मंचर, ता. ४ : ‘‘आंबेगाव-शिरूर विधानसभा मतदारसंघातील ग्रामीण आरोग्य सुविधांना चालना देण्यासाठी पुणे जिल्हा नियोजन मंडळाच्या २०२५-२६ या वर्षात योजनेतून ५ प्राथमिक आरोग्य केंद्रांच्या मुख्य इमारतींच्या विस्तारीकरण व देखभाल-दुरुस्तीच्या कामांसाठी १४ कोटी २७ लाख निधी मंजूर केला आहे. निधीसाठी माजी सहकारमंत्री दिलीप वळसे पाटील यांनी सातत्याने पाठपुरावा केला होता. याकामी उपमुख्यमंत्री तथा पुणे जिल्ह्याचे पालकमंत्री अजित पवार व पुणे जिल्हा नियोजन समितीचे सहकार्य मिळाले.’’ अशी माहिती आंबेगाव तालुका राष्ट्रवादी कॉंग्रेस पक्षाचे अध्यक्ष विष्णू हिंगे पाटील यांनी दिली.
हिंगे पाटील म्हणाले की, हा निधी डिंभे, पेठ, अडिवरे, महाळुंगे पडवळ व कवठे येथील प्राथमिक आरोग्य केंद्रांच्या सुधारणा व उन्नतीसाठी वापरण्यात येणार आहे. वाढती लोकसंख्या, आजारांचे बदलते स्वरूप व उपचारांची गरज लक्षात घेऊन प्राथमिक आरोग्य केंद्रांची क्षमता वाढविण्यासाठी सरासरी प्रत्येक आरोग्य केंद्राला दोन कोटी रुपयांपेक्षा अधिक निधी दिला आहे. त्यामुळे या भागातील नागरिकांना चांगल्या दर्जाच्या व सुसज्ज आरोग्य सुविधा उपलब्ध होणार आहेत. ग्रामीण भागात आरोग्य सेवा सक्षम होण्यासाठी हा निधी उपयुक्त ठरेल.