मंचरला घेवड्याने खाल्ला ‘भाव’

मंचर, ता ७ : आंबेगाव तालुक्यात सतत पाऊस पडत असल्याने तरकारी माल तोडणीवर मोठ्या प्रमाणात परिणाम झाला आहे. मंचर कृषी उत्पन्न बाजार समितीत रविवारी (ता.६) तरकारी मालाची आवक कमी झाली. त्यामुळे विशेषतः घेवडा प्रतिदहा किलोला एक हजार दोनशे रुपये व फरशीला एक हजार १०० रुपये उच्चांकी बाजारभाव मिळाला आहे. भुईमुगाच्या शेंगाच्या बाजार भावातही वाढ झाली आहे. अशी माहिती बाजार समितीचे सभापती नीलेश थोरात यांनी दिली.
ते म्हणाले “ येथील बाजार समितीत पुणे, मुंबई, कल्याण, सुरत भागातील व्यापारी तरकारीमाल खरेदीसाठी आले होते. पण सतत पाऊस पडत असल्याने पिकाची तोडणी करण्यासाठी शेतकऱ्यांना शेतात जाणे अवघड झाले आहे परिणामतः काही ठिकाणी तर पीक तोडणी अभावी पिक वाया गेले आहे. ज्या शेतकऱ्यांनी जमिनीतून पाणी काढून देऊन तरकारी पीक सुरक्षित ठेवले आहे त्यांची तरकारी मालाची सध्या तोडणे सुरू आहे. दरम्यान, आठ हजार ९८७ डागांची आवक झाली.
शेतीमालाचे नाव, प्रतिदहा किलोचे बाजार भाव : गवार ५५०-एक हजार एक, चवळी : ३५०-६००, ढोबळी मिरची : ४५०-७००, मिरची : ४०० -७५०, भुईमुग शेंगा : ३००-७३०, भेंडी : ३५०-८५०, फ्लावर : १००-३३१, कोबी : १००-१५०, काकडी : २००-३५०, आले : २००-२८०, चिवचिव वांगी : ३००-३५०, वांगी : ३००-६५१, कारले : २५०-६५० रुपये, बीट : १५० -३३५, मुळा : ८०.