मंचरमध्ये दिव्यांग विद्यार्थी, पालक मार्गदर्शन कार्यशाळा

मंचर, ता. ११ : जिल्हा परिषद प्राथमिक शाळा मंचर क्र. १ येथे आंबेगाव तालुकास्तरीय दिव्यांग विद्यार्थी व पालक मार्गदर्शन कार्यशाळा नुकतीच पार पडली. यामध्ये तालुक्यातील बहुविकलांग, अस्थिव्यंग, बौद्धिक अक्षमता, सेरेब्रल पाल्सी व इतर प्रवर्गातील एकूण ७८ दिव्यांग विद्यार्थी व पालकांनी सहभाग घेतला होता.
पुणे जिल्हा परिषदेच्या शिक्षण विभागाचे शिक्षणाधिकारी संजय नाईकडे यांच्या संकल्पनेतून व आंबेगाव तालुका पंचायत समितीच्या गटशिक्षणाधिकारी रूपाली धोका यांच्या मार्गदर्शनाखाली ही कार्यशाळा झाली. फिजिओथेरपिस्ट शशिकांत हुले यांनी दिव्यांग विद्यार्थ्यांच्या जीवनशैलीतील व्यायामाचे महत्त्व व विविध प्रकार तसेच संतुलित आहाराच्या गरजांवर मार्गदर्शन केले.
शिक्षण विस्तार अधिकारी कल्पना टाकळकर यांनी ‘गर्भवती महिलांनी घ्यावयाची काळजी’ या विषयावर व शैला निमसे यांनी शालेय जीवनातील दिव्यांग विद्यार्थ्यांना भेडसावणाऱ्या अडचणी आणि बदलत्या धोरणांबद्दल माहिती दिली. वडगाव काशिंबेग येथील मुख्याध्यापिका विना फदाले यांनी शासनाच्या विविध योजना, सोयी-सुविधा आणि मूल्यमापनाच्या प्रक्रियेवर सखोल विवेचन केले.
या उपक्रमात विशेष शिक्षक स्वाती पडवळ, प्रगती गांजाळे, सैफ सय्यद, सतीश केगले यांचा सक्रिय सहभाग होता. यावेळी मुख्याध्यापक किसन शिंगाडे, शिक्षकवृंद, ग्रामस्थ व पालक मोठ्या संख्येने उपस्थित होते. कार्यशाळेनंतर विद्यार्थ्यांसाठी भोजनाची व्यवस्था करण्यात आली होती. कार्यक्रमाचे प्रस्ताविक राजेश मंदावार यांनी केले. विनोद ढोबळे यांनी सूत्रसंचालन केले. छाया केदारी यांनी आभार मानले.

आंबेगाव तालुक्यात २३२ जिल्हा परिषद शाळा व माध्यमिक विद्यालयांमध्ये १८ वयोगटापर्यंत ५९४ दिव्यांग विद्यार्थी आहेत. या विद्यार्थ्यांच्या सर्वांगीण विकासासाठी अशाप्रकारच्या कार्यशाळा उपयुक्त आहेत. त्यांच्या पुढील वाटचालीस हे उपक्रम दिशा देणारे ठरतील.
- अर्चना कोल्हे, प्रभारी गटविकास अधिकारी, आंबेगाव तालुका पंचायत समिती, घोडेगाव