पिंपळगाव खडकी येथे दोन घरफोड्या

मंचर, ता. १२ : पिंपळगाव खडकी (ता. आंबेगाव) येथील पाटील मळा भागात शुक्रवारी (ता. ११) पहाटे दोन ठिकाणी घरफोडीच्या घटना घडल्या. यामध्ये नऊ हजार रुपये रोख रक्कम व सोन्याचे दागिने चोरीला गेल्याने परिसरातील नागरिकांत भीतीचे वातावरण निर्माण झाले आहे. या चोरट्यांचा बंदोबस्त त्वरित करावा, अशी मागणी नागरिकांनी मंचर पोलिसांकडे मागणी केली आहे.
सुखदेव बाबूराव पोखरकर व त्यांची पत्नी लक्ष्मीबाई सुखदेव पोखरकर हे ज्येष्ठ दांपत्य पाटीलमळा येथे राहत आहे. रात्री जेवणानंतर दोघे झोपले असताना त्यांच्या खोलीशेजारी असलेल्या खोलीचा कडी-कोयंडा तोडून अज्ञात चोरट्यांनी घरात प्रवेश केला. त्यांनी घरातील सामान अस्ताव्यस्त करत लक्ष्मीबाई यांच्या डब्यातील चार हजार रुपये रक्कम चोरून नेली.

बंद घरावर टार्गेट
पोखरकर यांच्या घराजवळच राहणारे अरविंद कांबळे व त्यांची पत्नी कामानिमित्त सोलापूरला गेले होते. त्यांच्या अनुपस्थितीत चोरट्यांनी घराचे कुलूप तोडून घरात प्रवेश केला. त्यांनी कपाटातील सामान अस्ताव्यस्त करत त्यांच्या पत्नीच्या पर्समधील अर्धा तोळ्याचे सोन्याचे झुमके आणि पाच हजार रुपये रक्कम असा मुद्देमाल चोरून नेला.
या प्रकरणाची माहिती मिळताच पोलिस पाटील बबुशा वाघ यांनी मंचर पोलिसांना कळविले. मंचर पोलिसांनी घटनास्थळी भेट देऊन पाहणी केली असून, पुढील तपास सुरू आहे.

गावोगावी अनेक फेरीवाले विविध वस्तू विक्रीसाठी येत असतात. हे फेरीवाले पूर्वतयारी म्हणून घरांची माहिती घेत असावेत, असा संशय ग्रामस्थांकडून व्यक्त केला जात आहे. त्यामुळे अशा फेरीवाल्यांवर नजर ठेवावी, त्यांची विचारपूस करावी आणि त्यांना घरात प्रवेश देऊ नये, त्यांच्या हालचाली संशयास्पद वाटल्यास तातडीच्या मदतीसाठी ११२ क्रमांकावर संपर्क साधावा.
- श्रीकांत कंकाळ, वरिष्ठ पोलिस निरिक्षक, मंचर पोलिस ठाणे