बंगल्यात घुसून कुत्र्याची शिकार

मंचर, ता.१३ : अवसरी खुर्द (ता.आंबेगाव) ग्रामपंचायतीच्या हद्दीतील भोरमळा येथे बंगल्याच्या आवारात घुसून बिबट्याने पाळीव कुत्र्याची शिकार केल्याची घटना उघडकीस आली आहे. संपूर्ण घटना सीसीटीव्ही कॅमेऱ्यात कैद झाली आहे. या घटनेमुळे परिसरात भीतीचे वातावरण निर्माण झाले आहे.
विकास मनाजी भोर व सोमनाथ भोर हे बंधू भोरमळा वस्तीत गेल्या अनेक वर्षापासून बंगल्यात वास्तव्यास आहेत. शुक्रवारी (ता.११) पहाटे चार वाजण्याच्या सुमारास बंगल्याबाहेर जोरजोरात पाळीव कुत्र्याच्या ओरडण्याचा आवाज आला. भोर बंधूंनी खिडकीतून बाहेर डोकावले असता काहीच दिसले नाही. पण सकाळी उठल्यावर पाळीव कुत्रा नजरेस न पडल्याने त्यांनी सी.सी.टी.व्ही. फुटेज तपासले असता धक्कादायक प्रकार समोर आला.
सीसीटीव्हीत बिबट्या बंगल्याच्या संरक्षण भिंतीवरून उडी मारून आवारात शिरताना व पाळीव कुत्र्याची शिकार करताना स्पष्टपणे दिसतो. यापूर्वी या परिसरात बिबट्याचे अनेकदा दर्शन आहे. पण थेट बंगल्यात प्रवेश करून शिकार केल्याची घटना धक्कादायक ठरली आहे. कारण परिसरात मोठ्या प्रमाणात गायींचे गोठे आहेत. स्थानिक शेतकरी शांताराम शिंदे, गणेश भोर व सुरेंद्र भोर यांनी वनविभागाकडे तातडीने पिंजरा लावण्याची व बिबट्याला जेरबंद करण्याची मागणी केली आहे.
दरम्यान, शेतात काम करताना नागरिकांनी सतर्क राहावे. बिबट्याला जेरबंद करण्यासाठी पिंजरा व आवश्यक त्या उपाययोजना तातडीने केल्या जातील, असे मंचरचे वनक्षेत्रपाल विकास भोसले यांनी सांगितले.