शासकीय तंत्रनिकेतन महाविद्यालयास सौर प्रकल्पासाठी अडीच कोटी मंजूर

मंचर, ता. १७ : ‘‘अवसरी खुर्द (ता. आंबेगाव) येथील शासकीय तंत्रनिकेतन महाविद्यालयासाठी २५० किलोवॅट क्षमतेच्या सौर ऊर्जा प्रकल्प उभारणीसाठी जिल्हा नियोजन समितीमार्फत जिल्हाधिकारी पुणे यांनी २ कोटी ४७ लाख ७ हजार रुपयांची प्रशासकीय मान्यता दिली आहे,’’ अशी माहिती प्राचार्य डॉ. विठ्ठल बांदल यांनी दिली.
या निधीसाठी राज्याचे माजी गृहमंत्री दिलीप वळसे-पाटील, महाराष्ट्र राज्य तंत्र शिक्षण संचालनालयाचे संचालक डॉ. विनोद मोहितकर, पुणे विभागाचे सहसंचालक डॉ. दत्तात्रेय जाधव, तसेच जिल्हाधिकारी जितेंद्र डूडी यांचे विशेष सहकार्य लाभल्याचेही डॉ. बांदल यांनी सांगितले.
या महाविद्यालयाची स्थापना १७ वर्षांपूर्वी झाली आहे. सध्या महाविद्यालयात ग्रामीण भागातील सुमारे १४०० विद्यार्थी शिक्षण घेत आहेत. दरवर्षी ४५ ते ४८ लाख रुपयांपर्यंत वीजबिलाचा खर्च महाविद्यालयास करावा लागत होता, मात्र नव्या सौर प्रकल्पामुळे हे वीजबिल शून्यावर येणार असून, शासनाचा आर्थिक भार मोठ्या प्रमाणात कमी होणार आहे. या प्रकल्पासाठी महाविद्यालयाच्या इमारतीच्या छतावर पर्याप्त जागा उपलब्ध आहे. हा प्रकल्प ग्रीन जॉब योजनेअंतर्गत मंजूर झाला असून निविदा प्रक्रिया पूर्ण होताच कामास सुरुवात होणार आहे.
दरम्यान, ग्लोबल हंट फाउंडेशन, नवी दिल्ली यांच्यातर्फे महाविद्यालयास १० लाख रुपये किमतीचे स्मार्ट डिजिटल बोर्ड देण्यात आले आहेत. हे आधुनिक बोर्ड वर्गखोल्यांत बसविले असून त्यामुळे विद्यार्थ्यांना डिजिटल शिक्षण अधिक प्रभावीपणे मिळणार आहे.