देवदूत दांपत्याची मदत

मंचर, ता. २२ : खेळण्याच्या नादात घरापासून दूर गेल्यानंतर घरी परतायचे कसे, या विचाराने घाबरलेल्या दोन चिमुकल्यांच्या मदतीसाठी धावून आलेले दांपत्य त्यांच्यासाठी देवदूतच ठरले आहेत. ही घटना एकलहरे (ता. आंबेगाव) गावात घडली. आई-वडिलांपासून दूर गेल्याने रडत असलेली दोन लहान मुले रस्ता ओलांडण्याचा प्रयत्न करत होती. समय सूचकता दाखवून जुन्नर तालुक्यातील दाम्पत्याने त्यांना मंचर पोलिसांच्या ताब्यात दिले. पोलिसांनी सर्वत्र शोध घेतल्यानंतर तब्बल चार तासाने मुलांना त्यांच्या आईच्या ताब्यात दिले.
गणेश खंडागळे व मनीषा गणेश खंडागळे (हिवरे बुद्रूक, ता. जुन्नर) असे मदतीला धावून आलेल्या दांपत्याचे नाव आहे. त्यांचा मंचर पोलिसांच्या वतीने सत्कार करण्यात आला. मंचर पोलिस ठाण्याचे साहाय्यक पोलिस निरीक्षक सुनील बडगुजर व पोलिस उपनिरीक्षक सुनील धवणे यांनी दिलेल्या माहितीनुसार, मंचर पोलिस ठाण्याच्या मागील बाजूस सफाई कामगार राहतात. जनाबाई सीताराम वाघमारे यांचा मुलगा रोहन (वय अडीच वर्षे) आणि सोनाली मंगेश मुकणे यांचा मुलगा निखिल (वय ४ वर्षे) हे खेळताखेळता साधारण दोन किलोमीटर अंतर पार करून जीवन मंगल कार्यालयासमोर पोहोचले. मात्र, घरी माघारी कसे जायचे, हे त्यांना कळत नव्हते. घाबरलेल्या अवस्थेत दोन चिमुकले महामार्ग ओलांडण्याचा प्रयत्न करत असल्याचे तेथून जाणाऱ्या खंडागळे दांपत्यास दिसले. त्यावेळी मुलांचे रडणे पाहून त्यांनी दोघांना जवळ घेऊन विचारपूस केली तेव्हा त्यांना काही सांगता येत नव्हते.
दांपत्याने दोन्ही मुलांना मंचर पोलिसांच्या ताब्यात दिले. पोलिसांनी बिस्कीट, चॉकलेट व पाणी देऊन मुलांना शांत केले. पोलिस पथक आई-वडिलांचा शोध घेत होते. दुपारी तीन वाजता दोन्ही मुलांची आई जनाबाई वाघमारे व सोनाली मुकणे यांच्या ताब्यात दिले. लहानगे काही क्षणातच आपल्या आईला बिलगली.

गणेश खंडागळे व मनीषा खंडागळे यांनी समय सूचकता दाखवून तत्परतेने मुलांना राष्ट्रीय महामार्गापासून अलिप्त करून मंचर पोलिस ठाण्यात आणले. त्यांचे काम व तत्परता दिशादर्शक आहे.
- सुनील बडगुजर, साहाय्यक पोलिस निरीक्षक, मंचर पोलिस ठाणे