वडगाव काशिंबेगमध्ये बिबटे सीसीटीव्हीत कैद

मंचर, ता.२३ : श्री क्षेत्र वडगाव काशिंबेग (ता. आंबेगाव) येथे शेटेमळा परिसरात माजी सरपंच सुखदेव शेटे यांच्या घरासमोर तीन बिबटे एकत्रितपणे आल्याचा प्रसंग बुधवारी (ता. २३) मध्यरात्री सीसीटीव्हीत कैद झाला. हे बिबटे घरासमोरील ओट्यावरून दबक्या पावलांनी जनावरांच्या गोठ्याकडे जाताना दिसले.
बिबटे गोठ्यातील वासराची शिकार करण्याच्या उद्देशाने शिरले होते. मात्र, गोठ्यातील जनावरांच्या हंबरण्याच्या आवाजामुळे कुटुंबातील सदस्यांना जाग आली. त्यांनी आरडाओरड करत व काठी दाखवत बिबट्यांना हुसकावून लावले. त्यामुळे वासरू व इतर जनावरे वाचली. या घटनेमुळे परिसरात भीतीचे वातावरण पसरले असून, नागरिकांमध्ये असुरक्षिततेची भावना निर्माण झाली आहे. वनविभागाकडे तत्काळ पिंजरा लावण्याची मागणी माजी सरपंच बाळासाहेब पिंगळे यांनी केली आहे.

वडगाव काशिंबेग परिसरात मोठ्या प्रमाणात उसाचे क्षेत्र आहे. शेतकऱ्यांनी काळजी घ्यावी. वनखात्याचे कर्मचारी गस्त घालून जनजागृती करतील. बिबट्यांना जेरबंद करण्यासाठी पिंजरे लावण्यात येतील.
- विकास भोसले, वनपरिक्षेत्र अधिकारी, मंचर.

नागरिकांनी घ्यावयाची काळजी
- रात्रीच्या वेळी घराबाहेर पडू नये.
- लहान मुलांना एकटे सोडू नका
- जनावरांना सुरक्षित ठिकाणी बांधावे.
- लाइट, टॉर्च किंवा मोबाईल फ्लॅशचा वापर करा.
- किमान दोन ते तीन शेतकऱ्यांनी एकत्र सावधपणे शेतात काम करावे.

.....................................