बिबट्याच्या हल्ल्यामध्ये अवसरीत दोन शेळ्या ठार

मंचर, ता.३० : अवसरी खुर्द (ता.आंबेगाव) ग्रामपंचायत कार्यक्षेत्रातील पंधराभीगा परिसरात बुधवारी (ता.३०) पहाटे बिबट्याच्या हल्ल्यात दोन शेळ्या ठार झाल्याची घटना घडली. सुनील भोर यांच्या शेळ्यांच्या गोठ्यात घडलेल्या या घटनेमुळे परिसरात भीतीचे वातावरण निर्माण झाले आहे. या हल्ल्यात शेतकरी भोर यांचे २८ हजार रुपयांचे नुकसान झाले आहे.
या घटनेनंतर सरपंच वैभव वायळ यांनी तातडीने पिंजरा लावून बिबट्याला जेरबंद करण्याची मागणी मंचर वनपरिक्षेत्र कार्यालयाकडे केली आहे.
भोर यांच्या घराजवळ ३० शेळ्यांचा बंदिस्त गोठा आहे. गेल्या अनेक महिन्यांपासून बिबट्या व त्याचे दोन बछडे गोठ्याजवळ फिरताना दिसत होते. याबाबत भोर यांनी वन विभागाला वेळोवेळी माहिती दिली होती. मात्र, पिंजरा न लावल्यामुळे अखेर बुधवारी पहाटे बछड्याने तारेच्या संरक्षक भिंतीवरून उडी मारून आत प्रवेश केला. अन्य शेळ्यांचा ओरडण्याचा आवाज आल्यामुळे कुटुंबातील सदस्य जागे झाले. भोर यांनी पाहिले असता दोन शेळ्यांचा फडशा पडला होता.
मंचर वनपरिक्षेत्र अधिकारी विकास भोसले, वनरक्षक एस. के. ढोले यांनी घटनास्थळी भेट देऊन पंचनामा केला. “बिबट्याचा बंदोबस्त करण्यासाठी पिंजरा लावला जाईल.” असे वनखात्याकडून सांगण्यात आले.