अंत्यविधीसाठी जातानाच रस्त्यात मृत्यूने गाठले

मंचर, ता ५: पुणे-नाशिक राष्ट्रीय महामार्गावरील भोरवाडी-तांबडे मळा (ता. आंबेगाव) घाटाजवळ मोटारीने मोटरसायकलला मागून धडक दिली. यामुळे झालेल्या अपघातात रत्नाकर मारुती वाळुंज (वय ५५, रा. पिंपरी बुद्रुक, ता. खेड) यांचा जागीच मृत्यू झाला. हा अपघात मंगळवारी (ता.५) संध्याकाळी पाचच्या सुमारास घडला.
रत्नाकर वाळुंज हे मंचर येथे मोटरसायकलवरून (एम एच १४ जी .एम३०२६) अंत्यविधीसाठी जात होते. या अपघातात यावेळी त्यांच्या समवेत असलेले भगवान बाबूराव रिठे (रा. पिंपरी बुद्रुक ता. खेड) हे गंभीर जखमी झाले असून त्यांच्यावर मंचर उपजिल्हा रुग्णालयात उपचार सुरू आहेत.

मंचर पोलिस ठाण्याचे पोलिस निरीक्षक श्रीकांत कंकाळ व पोलिस हवालदार तानाजी हगवणे, व्ही. जी. भालेराव यांनी अपघात स्थळाला भेट दिली आहे. अपघात करून पळून गेलेली मोटार व तिच्या चालकाचा पोलिसांनी सीसीटीव्ही कॅमेरे तपासून शोध सुरू केला आहे.
दरम्यान, मंचर उपजिल्हा रुग्णालयात वाळुंज व रेठे यांचे नातेवाइक जमा झाले होते. त्यांनी अपघाताला कारणीभूत ठरलेल्या मोटारीचा शोध घेऊन चालकाला अटक करावी, अशी मागणी मंचर पोलिसांकडे आक्रमकपणे केली.