वडगावला बिबट्याचा पती-पत्नीवर हल्ला

मंचर, ता.१३ : मंचरजवळ श्रीक्षेत्र वडगाव काशिंबेग फाटा (ता.आंबेगाव) येथे भीमाशंकर रुग्णालयात पत्नीला कामावर सोडवण्यासाठी जात असताना दुचाकीवर चाललेल्या पती-पत्नीवर बिबट्याने हल्ला केला. ही घटना मंगळवारी (ता.१२) रात्री आठ वाजता घडली आहे.
बिबट्याच्या हल्ल्यात दोघे जखमी झाले आहेत. प्रसंगावधान राखून पती-पत्नीने जोरदार प्रतिकार केल्यामुळे बिबट्याने धूम ठोकली.
‘नशीब बलवत्तर म्हणूनच आमचा जीव वाचला,’ असे या हल्ल्यात जखमी झालेले शशिकांत केरभाऊ गायकवाड (वय ४८, रा. वाळुंजवाडी, ता. आंबेगाव) यांनी सांगितले. दोन्ही जखमींवर मंचर उपजिल्हा रुग्णालयात उपचार सुरू असून त्यांच्या प्रकृतीत सुधारणा झाल्याचे डॉक्टरांनी सांगितले.
पत्नी वैशाली या भीमाशंकर रुग्णालय येथे काम करतात. दरम्यान, मंगळवारी रात्री शशिकांत गायकवाड हे वैशाली यांना दुचाकीवरून भीमाशंकर रुग्णालयाकडे जात होते. रस्त्याच्या कडेला दबा धरून बसलेल्या बिबट्याने त्यांच्यावर हल्ला केला. दुचाकी सह पती-पत्नी रस्त्यावर पडले. अशाही स्थितीत बिबट्याने पुन्हा त्यांच्यावर हल्ला करण्याचा प्रयत्न केला. मात्र त्यांनी न घाबरता धाडस दाखवून दगड बिबट्याच्या दिशेने फेकण्यास सुरुवात केली. त्यानंतर बिबट्या निघून गेला.
घटनेची माहिती मिळाल्याबरोबर सरपंच नवनाथ वाळुंज, गायकवाड यांच्या कुटुंबातील ऋतिक गायकवाड, मयूर गायकवाड घटनास्थळी आले. त्यांनी जखमींना मंचर उपजिल्हा रुग्णालयात उपचारासाठी दाखल केले आहे. दोघांची प्रकृती स्थिर असल्याचे रुग्णालयातून सांगण्यात आले.
मंचर वनपरिक्षेत्र अधिकारी विकास भोसले व वनखात्याच्या कर्मचाऱ्यांनी रुग्णालयात जाऊन रुग्णांना नियमानुसार मदत करण्याचे आश्वासित केले.

अरुण निघोट यांच्या कुत्र्याचा बिबट्याने फडशा पाडला आहे. जवळच असलेल्या श्रीक्षेत्र वडगाव काशिंबेग गावातही अनेक पाळीव प्राण्यांना बिबट्याने ठार केले आहे. या पार्श्वभूमीवर येथे पिंजरा लावून बिबट्याला जेरबंद करावे, अशी मागणी सरपंच नवनाथ वाळुंज यांनी केली आहे
13863