गळ्यात कांद्याच्या माळा घालून आंदोलन

मंचर, ता.१९ : कांद्याला प्रतिकिलोला दहा रुपये ते १७ रुपये बाजारभाव आहे. तो परवडत नसल्याने शेतकरी आर्थिक संकटात सापडला आहे. कांदा निर्यात शुल्क रद्द करावे व बाजारभाव वाढवून शेतकऱ्यांना न्याय द्यावा. या मागणीसाठी मंचर (ता.आंबेगाव) कृषी उत्पन्न बाजार समिती येथे मंगळवारी (ता.१९) स्वाभिमानी शेतकरी संघटनेचे पुणे जिल्हा अध्यक्ष प्रभाकर बांगर यांच्या नेतृत्वाखाली राज्य सरकारच्या विरोधात भर पावसात आंदोलन करण्यात आले. यावेळी शेतकऱ्यांनी गळ्यात कांद्याच्या माळा घालून आंदोलन केले.
यावेळी प्रकाश कोळेकर, संजय पालेकर, पंकज पोखरकर, भालचंद्र बोठे, पंकज गावडे व नारायण थोरात यांच्यासह शेतकरी उपस्थित होते.
प्रभाकर बांगर म्हणाले, “कांदा निर्यात सुरू केली. तरच शेतकऱ्यांच्या कांद्याला चांगला बाजारभाव मिळेल सद्यस्थितीमध्ये औषधे, खते, मजुरी आदि वाढलेले दर लक्षात घेता सध्याचा बाजारभाव अजिबात परवडत नाही. त्यामुळे शेतकरी चिंतेत आहेत. शेतकऱ्यांना प्रतिदहा किलोला किमान २२o रुपये ते २५o रुपये बाजारभाव मिळाला पाहिजे. सद्यःस्थितीत वातावरणातील बदला मुळे चाळीत साठवलेला कांदा सडण्याचे प्रमाण वाढले आहे. त्यामुळे शेतकरी कांदा विक्रीसाठी आणत आहेत. या पार्श्वभूमीवर शेतकऱ्यांना प्रतिकिलोला चार रुपये ते पाच रुपये अनुदान मिळाले पाहिजे.”
आंदोलनादरम्यान, संतोष पवार, वनाजी बांगर, तुकाराम गावडे व मारुती गोरडे यांनी मनोगते व्यक्त केली.

13912