कळंबला दुचाकीच्या धडकेत बीडमधील आंदोलक जखमी

मंचर, ता. २८ : मनोज जरांगे पाटील यांच्या आंदोलनात सहभागी असलेले बीड जिल्ह्यातील आंदोलक प्रा. गणेश भीमराव धपाटे (वय ५३) हेपुणे- नाशिक राष्ट्रीय महामार्गावर कळंब (ता. आंबेगाव) येथे गुरुवारी (ता. २८) सव्वाबाराच्या सुमारास मोटारसायकलस्वाराने धडक दिल्याने झालेल्या अपघातात गंभीर जखमी झाले. त्यांच्यावर मंचर (ता. आंबेगाव) येथे एका खासगी रुग्णालयात उपचार सुरु आहेत.
केज (जि. बीड) येथील वसंत ज्युनिअर कॉलेजमधील प्रा. धपाटे, गणेश चाळक यांच्यासह चार प्राध्यापक जरांगे पाटील यांच्या ‘चलो मुंबई’ आंदोलनात सहभागी झाले होते. ते नारायणगाव (ता. जुन्नर) येथून मोटारीमधून मंचरकडे जात होते. कळंब बाह्यवळणावर स्थानिक नागरिक मोठ्या संख्येने उपस्थित होते. रस्त्याच्या कडेला गाडी उभी करून ते स्थानिक नागरिकांकडे जात असताना मोटारसायकलस्वाराची प्रा. धपाटे यांना धडक बसली. ते खाली कोसळल्याने बेशुद्ध पडले. स्थानिक नागरिक व रुग्णवाहिका चालक हर्षल भालेराव यांनी त्यांना उपचारासाठी ताबडतोब मंचर येथे एका खासगी रुग्णालयात दाखल केले. त्यांच्या छातीला व उजव्या पायाला दुखापत आहे, असे डॉ. अतुल शिंदे यांनी सांगितले.
दरम्यान, आंबेगाव तालुक्यातील सकल मराठा समाजाचे अजय घुले, नीलकंठ काळे, जगदीश घिसे, मुन्ना गाडे व गणेश गाडे यांनी प्रा. धपाटे यांच्या समवेत असलेल्या प्राध्यापकांची भेट घेऊन त्यांना धीर दिला. ‘खासगी रुग्णालयाचा सर्व खर्च केला जाईल. तसेच अन्य प्राध्यापकांची निवास व भोजन व्यवस्था केली आहे. काळजी करू नका,’ असे त्यांनी सांगितले.