बेंडेमळ्यातील मंदिरात चोरी; ६५ हजारांच्या पादुका लंपास

मंचर, ता. १ : मंचर शहर- बेंडेमळा (ता. आंबेगाव) येथे भरवस्तीत असलेल्या श्री स्वामी समर्थ मंदिरात सोमवारी (ता. १) पहाटे तीनच्या सुमारास चोरीची घटना घडली आहे. चोरट्यांनी मंदिराच्या गाभाऱ्यातून ६५ हजार रुपये किमतीच्या स्वामींच्या चांदीच्या पादुका चोरून नेल्या. एक महिला व एक पुरुष असे दोन चोरटे सीसीटीव्ही कॅमेऱ्यात कैद झाले आहेत.
दरम्यान, राज्याचे माजी गृहमंत्री दिलीप वळसे पाटील यांच्या बंगल्यासमोरच हे मंदिर आहे. त्यामुळे या चोरीच्या घटनेमुळे शहरात खळबळ उडाली असून, पोलिसांचा वचक नसल्याची चर्चा रंगू लागली आहे. रविवारी (ता. ३१) रात्री नेहमीप्रमाणे प्रगती बेंडे यांनी मंदिरात आरती करून दरवाजाला कुलूप लावले. मात्र, सोमवारी सकाळी काही भक्तांनी दरवाजा उघडा असल्याचे लक्षात आणून दिले. त्यानंतर मंदिरात येऊन पाहणी केली असता, चोरट्यांनी कटावणीच्या साहाय्याने गाभाऱ्याचे कुलूप- कडी तोडल्याचे व पादुका चोरून नेल्याचे दिसून आले. चोरट्यांनी दानपेटीही फोडण्याचा प्रयत्न केला. मात्र, ती साखळीने बांधलेली असल्याने रक्कम सुरक्षित राहिली. चोरटे मंचर येथील छत्रपती संभाजी महाराज चौकाकडे दुचाकीवर निघून गेल्याची, माहिती शेखर जाधव यांनी दिली.
या प्रकरणी मंचर पोलिस ठाण्यात फिर्याद दाखल केली असून, वरिष्ठ पोलिस निरीक्षक श्रीकांत कंकाळ यांच्या मार्गदर्शनाखाली तपास सुरू आहे.