अवसरी खुर्द-भोरमळा येथे बिबट्याकडून २ शेळ्या फस्त

मंचर, ता.१ : अवसरी खुर्द-भोरमळा (ता. आंबेगाव) येथे सोमवारी (ता.१) पहाटे तीनच्या सुमारास शेतकरी बाळसाहेब धोंडिबा भोर यांच्या घराशेजारी बंदिस्त असलेले पत्रा शेडची नायलॉनची जाळी तोडून बिबट्याने दोन शेळ्या फस्त केल्या. तिसऱ्या शेळीवर हल्ला करताच तिच्या ओरडण्याचा आवाज आला. त्यामुळे कुटुंबातील सदस्य मदतीसाठी धावून आले. त्यामुळे तिचा प्राण वाचला आहे.
अवसरी परिसरात बिबट्याचा वावर असल्याने पशुधनाच्या संरक्षणासाठी शेतकऱ्यांनी बंदिस्त गोठे केले आहेत. तिसऱ्या शेळीवर बिबट्याने झडप टाकल्यानंतर झालेल्या आवाजाने बाळसाहेब भोर, मुलगा रोहिदास, पत्नी शकुंतला व सून पूजा हातात काठ्या घेऊन घरातून बाहेर आले. त्यांना पाहून बिबट्या तिथून निघून गेला.
दरम्यान, शेजारी राहणारे विकास भोर पाटील व अन्य शेतकरी मदतीसाठी धावून आले. शेळीच्या मानेला मोठ्या स्वरूपाच्या जखमा झाल्या आहेत. पशुवैद्यकीय अधिकाऱ्यांनी शेळीवर उपचार केले आहेत.
वनरक्षक शिवाजीराव कैलास ढोले यांनी सदर घटनेचा पंचनामा केला असून ३० हजार रुपयांचे नुकसान झाल्याचे नमूद केले आहे. “याभागात वनखात्यामार्फत गस्त घातली जाईल. नागरिकांनी सतर्क राहावे.” असे मंचरचे वनपरिक्षेत्र अधिकारी विकास भोसले यांनी सांगितले.
14024