अवसरी खुर्द येथे मंगळवारी राष्ट्रीय परिषद

मंचर, ता. ८ : अवसरी खुर्द (ता. आंबेगाव) येथील शासकीय अभियांत्रिकी व संशोधन महाविद्यालयात मंगळवार (ता. १६) व बुधवारी(ता. १७) ग्रामीण विकासासाठी कृत्रिम बुद्धिमत्ता आणि डेटा सायन्स-२०२५ या विषयावर राष्ट्रीय परिषदेचे आयोजन केले आहे. अखिल भारतीय तंत्रशिक्षण परिषद (एआयसीटीई), नवी दिल्ली यांच्या व्हायब्रंट अॅडव्होकसी फॉर अॅडव्हान्समेंट ॲण्ड नर्चरिंग ऑफ इंडियन लँग्वेजेस (वाणी) या योजनेअंतर्गत परिषद आयोजित केली आहे. परिषद मराठी भाषेतून होणार आहे, अशी माहिती शासकीय अभियांत्रिकी व संशोधन महाविद्यालयाचे प्राचार्य डॉ. नवनाथ नेहे यांनी दिली.
परिषदेचा उद्‍घाटन मंगळवारी सकाळी १०.३० वाजता महाविद्यालयातील कवयित्री शांता शेळके सभागृहात होणार असून पुढील सत्र यंत्र अभियांत्रिकी व उपकरणीकरण अभियांत्रिकी विभागात होईल. भारतीय प्रादेशिक भाषांमध्ये तांत्रिक ज्ञानाचा प्रसार व संशोधनाला चालना देण्याच्या उद्देशाने एआयसीटीईतर्फे देशभरात परिषदा व कार्यशाळा आयोजित केल्या जात आहेत. ग्रामीण भागातील विकासासाठी अत्याधुनिक तंत्रज्ञानाचा वापर कसा करता येईल? यावर ही परिषद केंद्रित असून कृत्रिम बुद्धिमत्ता व डेटा सायन्सच्या साहाय्याने शेती, आरोग्य, शिक्षण व प्रशासनातील आव्हानांवर उपाय शोधण्याचा प्रयत्न केला जाणार आहे.
माजी गृहमंत्री, दिलीप वळसे-पाटील व राजगुरुनगर कांदा-लसूण संशोधन केंद्राचे संचालक डॉ. सुरेश गावंडे यांच्या प्रमुख उपस्थितीत ही कार्यशाळा होईल. एकूण ११ सत्रांमध्ये ४५ शोधनिबंध सादर केले जाणार आहेत. संशोधक, शिक्षक, उद्योग तज्ञ व विद्यार्थ्यांनी जास्तीत जास्त संख्येने सहभागी होऊन मराठी भाषेतून नवनवीन संकल्पना व संशोधन सादर करावेत, असे आवाहन परिषदेचे निमंत्रक डॉ. मिलिंद बोनगुलवार, सचिव डॉ. निवेदिता वाघ व सहसचिव डॉ. चंद्रशेखर सेवतकर यांनी केले आहे.