मंचरला सरकारविरोधात घोषणाबाजी

मंचर, ता.१० : मंचर (ता.आंबेगाव) येथली छत्रपती शिवाजी महाराज चौक येथे बुधवारी (ता.१०) महाविकास आघाडीच्या वतीने जन सुरक्षा विधेयकाविरोधात एकत्रित आंदोलन करण्यात आले. आंदोलनात महाविकास आघाडीतील सर्व घटक पक्षांचे पदाधिकारी, कार्यकर्ते व नागरिकांनी मोठ्या संख्येने उपस्थित राहून सरकारविरोधात घोषणाबाजी केली. यावेळी आंदोलकांच्या भावना तीव्र होत्या.
आंदोलनकर्त्यांनी या विधेयकामुळे सामान्य जनतेच्या मूलभूत अधिकारांवर गदा येईल व लोकशाहीच्या मूल्यांना धोका निर्माण होईल असा आरोप केला. उद्धव ठाकरे शिवसेने पक्षाचे जिल्हाध्यक्ष सुरेश भोर, राष्ट्रवादी काँग्रेस शरदचंद्र पवार पक्षाचे तालुका अध्यक्ष विशाल वाबळे, किसान सभेचे डॉ. अमोल वाघमारे, आंबेगाव तालुका काँग्रेस पक्षाचे अध्यक्ष राजू इनामदार आदींनी सरकारच्या भूमिकेचा निषेध नोंदवला.
शांततेत पार पडलेल्या या आंदोलनात जोरदार घोषणाबाजी, जनजागृती व सरकारच्या धोरणांचा निषेध करण्यात आला. “लोकशाही व्यवस्थेची गळचेपी करणारे कोणतेही निर्णय स्वीकारले जाणार नाहीत.” असा इशारा शरदचंद्र पवार पक्षाचे तालुका अध्यक्ष धोंडिभाऊ भोर, माजी सरपंच बाळासाहेब बाणखेले, राजाराम बाणखेले, सुरेश निघोट, नीलेश वळसे पाटील, स्वाभिमानी शेतकरी संघटनेचे जिल्हाध्यक्ष प्रभाकर बांगर यांनी दिला.