जनसेवक उल्लेख करण्याची मागणी

मंचर, ता. ३१ : भारतीय न्याय संहिता २०२३ नुसार प्रत्येक शासकीय अधिकारी व कर्मचारी हा ‘जनसेवक’ असल्याचे कायद्यात स्पष्ट नमूद आहे. पण हा उल्लेख प्रत्यक्ष प्रशासनात ठळकपणे दिसून येत नाही, राज्य शासनाच्या सर्व कार्यालयांतील अधिकाऱ्यांच्या दालनाबाहेरील नामफलकावर त्यांच्या पदनामासोबत ‘जनसेवक’ असा स्पष्ट उल्लेख करणे बंधनकारक करावे, अशी मागणी अखिल भारतीय ग्राहक पंचायत मध्य महाराष्ट्र प्रांताचे अध्यक्ष बाळासाहेब सिताराम औटी व ग्राहक पंचायतीचे विधी आयाम प्रमुख श्रीकांत जोशी यांनी मुख्यमंत्री, उपमुख्यमंत्री, महसूल मंत्री व प्रधान सचिव यांच्याकडे निवेदनाद्वारे केली आहे.
त्यांनी सांगितले की, नामफलकावर ‘जनसेवक’ असा उल्लेख केल्यास प्रशासन अधिक जबाबदार, पारदर्शक व नागरिकाभिमुख होईल. सदर मागणी ही कोणत्याही अधिकाऱ्याविरोधात नसून, लोकशाही मूल्ये, कायद्याचे सविनय पालन व ग्राहक- नागरिक हक्कांचे संरक्षण या व्यापक जनहितासाठी आहे. महाराष्ट्र शासनाने याबाबत तातडीने शासन निर्णय/ परिपत्रक निर्गमित करून, ‘ग्राहकाभिमुख व जबाबदार प्रशासन’ उभारण्यास पुढाकार घ्यावा.