राजू शेट्टी यांचे आज अवसरीत मार्गदर्शन

मंचर, ता. ३ : अवसरी खुर्द (ता. आंबेगाव) येथे ग्रामपंचायतीसमोरील मुख्य चौकात रविवारी (ता. ४) सकाळी ९ वाजता शेतकरी मेळाव्याचे आयोजन केले आहे. त्यात स्वाभिमानी शेतकरी संघटनेचे संस्थापक अध्यक्ष व माजी खासदार राजू शेट्टी मार्गदर्शन करणार आहेत, अशी माहिती स्वाभिमानी शेतकरी संघटनेचे जिल्हाध्यक्ष प्रभाकर बांगर यांनी दिली.
सन २०२२ मध्ये राज्य सरकारने काढलेला उसाच्या एफआरपीसंदर्भातील अध्यादेश उच्च न्यायालयात रद्द करून कारखानदारांना एकरकमी एफआरपी देण्यास भाग पाडण्यात आले. या महत्त्वपूर्ण लढ्याबद्दल ऊस उत्पादक शेतकऱ्यांच्या वतीने शेट्टी यांचा मेळाव्यात जाहीर सत्कार करण्यात येणार आहे. मेळाव्यात संपूर्ण कर्जमाफी, जर्सी गोऱ्हे व भाकड जनावरांचा प्रश्न, दुधातील भेसळ, उत्तर पुणे जिल्ह्यात वाढलेला बिबट्यांचा उपद्रव, शेतीमालाला उत्पादन खर्चावर आधारित हमीभावाचा कायदा या महत्त्वाच्या मुद्द्यांवर चर्चा होणार आहे, असे बांगर यांनी सांगितले.