मंचर येथे ज्येष्ठांसाठी विरंगुळा केंद्र बांधणार : वळसे पाटील

मंचर, ता. ५ : “आंबेगाव तालुक्यातील ज्येष्ठ नागरिकांसाठी बारामतीप्रमाणेच मंचर येथे विरंगुळा केंद्र इमारतीचे प्रशस्त सर्व सोयींयुक्त बांधकाम केले जाईल. तसेच प्रत्येक गावात नोंदणीकृत ज्येष्ठ नागरिकांसाठी आवश्यक सुविधा उपलब्ध करून देण्यासाठी निधी उपलब्ध करून दिला जाईल,” असे राज्याचे माजी गृहमंत्री दिलीप वळसे पाटील यांनी सांगितले.
मंचर (ता. आंबेगाव) येथे ज्येष्ठ नागरिक समन्वय समिती व डी. जी. फाउंडेशन यांच्या संयुक्त विद्यमाने ज्येष्ठ नागरिकांच्या मेळाव्यात ते बोलत होते. कार्यक्रमाच्या अध्यक्षस्थानी माजी खासदार व पुणे म्हाडाचे अध्यक्ष शिवाजीराव आढळराव पाटील होते.
यावेळी भीमाशंकर कारखान्याचे अध्यक्ष बाळासाहेब बेंडे, अण्णासाहेब टेकाळे, नीलेश थोरात, नवनाथ हुले, संजय थोरात, नगराध्यक्षा राजश्री गांजाळे, सचिन भोर, चंद्रकांत महामुनी, हनुमंत कुंभार, एकनाथ वाळुंज, प्रकाश खोचेकर, देवराम नाबगे उपस्थित होते. यावेळी ‘आधारवड’ स्मरणिकेचे प्रकाशन करण्यात आले.
आढळराव पाटील यांनी ज्येष्ठ नागरिकांच्या जीवनशैलीवर भाष्य करत आनंदी, तणावमुक्त जीवन जगण्याचा सल्ला दिला.
फेस्कॉमचे उपाध्यक्ष ए. एफ. इनामदार यांनी ‘आधारवड’ स्मरणिकेची माहिती दिली. समन्वय समितीचे अध्यक्ष दशरथ भालेराव यांनी ज्येष्ठ नागरिक संघाच्या कामकाजाची माहिती दिली. स्मरणिकेसाठी देणगी देणाऱ्या दात्यांचा सत्कार करण्यात आला.
काशिनाथ वळसे पाटील, सोपानराव नवले, सखाराम भालेराव, सूर्यकांत थोरात, भास्कर लोंढे, मारुती भोर, दत्तात्रय राऊत यांनी व्यवस्था पाहिली. सूत्रसंचालन संजय बोऱ्हाडे यांनी केले. आभार सोपान हुले यांनी मानले.