आंबेगावच्या दिव्यांगांना निधी देण्याची मागणी

मंचर, ता. १३ : आंबेगाव तालुक्यात ३५४७ दिव्यांग बांधव आहेत. त्यांच्या सर्वांगीण विकासासाठी आमदार निधीतून ३० लाख रुपये निधीची तरतूद माजी गृहमंत्री दिलीप वळसे पाटील यांनी करावी, अशी मागणी दिव्यांग संघटना आंबेगाव तालुका यांच्या वतीने निवेदनाद्वारे करण्यात आली.
मंचर येथे वळसे पाटील यांना निवेदन देण्यात आले. दिव्यांग व्यक्तींसाठी पायाभूत सुविधांसाठी तसेच गरजेच्या साहित्यासाठी निधीची गरज आहे. दिव्यांग निधीबाबत शासन आदेश ता.२७ फेब्रुवारी २०२३ जारी करण्यात आला आहे. राज्यातील व पुणे जिल्ह्यातील बहुतांशी आमदार आपला दरवर्षीचा दिव्यांग निधी खर्च करत नाही. त्यामुळे दिव्यांग व्यक्तींना त्यांच्या मागणीनुसार पायाभूत सुविधा उपलब्ध होत नाही. दिव्यांग व्यक्तींसाठी पेट्रोलवर/इलेक्ट्रिकवर चालणाऱ्या टू व्हीलर द्याव्यात, अशी मागणी दिव्यांग बांधवांनी केली.
वळसे पाटील यांनी दिव्यांग बांधवांशी संवाद साधून माहिती घेऊन आपण हा निधी लवकर आपल्या तालुक्यातील दिव्यांग व्यक्तींसाठी खर्च करू, असे आश्वासन दिले. यावेळी दिव्यांग संघटनेचे समीर टाव्हरे, सुनील दरेकर, नवनाथ भोर, ललिता बोऱ्हाडे, शोभा पिंगळे, सविता काळे, पुष्पाताई आवटे, दीपा गावडे, भाऊसाहेब वाळुंज, जालिंदर थोरात, ज्ञानेश्वर शिंदे आदी दिव्यांग बांधव उपस्थित होते.