आंबेगावात तीन गावांमध्ये खासगी पाण्याचे टँकर सुरू

मंचर, ता. १४ : आंबेगाव तालुक्यातील काही भागांमध्ये पिण्याच्या पाण्याची टंचाई तीव्र झाल्याने प्रशासनाने तातडीने उपाययोजना सुरू केल्या आहेत. पंचायत समितीच्या माध्यमातून कारेगाव, थुगाव आणि पारगावतर्फे खेड या तीन गावांसाठी खासगी पाण्याचे टँकर सुरू करण्यात आले आहेत. या टँकरद्वारे परिसरातील विविध वाड्या-वस्त्यांवरील सुमारे ६ हजार ८२५ नागरिकांना पिण्याच्या पाण्याचा पुरवठा केला जात असल्याची माहिती पंचायत समितीचे सभापती कैलास काळे यांनी दिली.
भावडी, कुरवंडी, पेठ, निघोटवाडी, दस्तुरवाडी, माळीण, पहाडदरा आणि वडगावपीर या ग्रामपंचायतींचे टँकर सुरू करण्याबाबतचे प्रस्ताव मंजुरीसाठी पाठविण्यात आले असून, लवकरच त्या गावांमध्येही पाणीपुरवठा सुरू होणार असल्याचे प्रशासनाने स्पष्ट केले आहे. तसेच, ज्या गावांमध्ये पाण्याची तीव्र टंचाई निर्माण झाली आहे, त्यांनी पंचायत समिती आंबेगाव, घोडेगाव येथे प्रस्ताव सादर करावेत, असे आवाहन आंबेगाव तालुका पंचायत समितीच्या उपसभापती ज्योती पारधी व गटविकास अधिकारी प्रमिला वाळूज यांनी केले आहे.