माळेगाव कारखान्यासाठी आज मतदान

माळेगाव, ता. २१ : माळेगाव (ता. बारामती) सहकारी साखर कारखाना पंचवार्षिक निवडणुकीसाठी रविवारी (ता. २१) मतदान होणार आहे. २१ जागांसाठी ९० उमेदवार रिंगणात आहेत. या उमेदवारांमध्ये ‘ब’ वर्ग संस्था मतदारसंघातून उपमुख्यमंत्री अजित पवार यांचाही समावेश आहे. त्या पार्श्वभूमीवर माळेगाव कार्यक्षेत्रातील जवळपास ३७ गावांतील सुमारे १९ हजार सातशे मतदार रविवारी मतदानाचा हक्क बजावणार आहेत. मंगळवारी (ता. २४) निकाल जाहीर होणार आहे.
‘माळेगाव’च्या निवडणुकीत निळकंठेश्वर, सहकार बचाव, बळिराजा आणि कष्टकरी शेतकरी पॅनेलमध्ये चौरंगी लढत होत आहे. त्यामुळे या मतदान प्रक्रियेत वरील पैकी कोणता पॅनेल रविवारी स्वत:कडे अधिकचे मतदार खेचून घेतो, त्यावर निवडणुकीचा निकाल अवलंबून आहे.
‘माळेगाव’साठी चुरशीची होणारी निवडणूक विचारात घेत प्रशासनाने आवश्यकती तयारी केली आहे. मोठ्या संख्येने मतदार मतदान करण्यासाठी घराबाहेर पडतील, या उद्देशाने प्रशासनाने रविवारी सकाळी ७ ते सायंकाळी ६ वाजेपर्यंत मतदान होईल, अशी वेळ निश्चित केली आहे. त्यासाठी कार्यक्षेत्रात एकूण ६७ मतदान केंद्र निश्चित केली आहे. गट क्रमांक १ माळेगाव येथे ११, गट क्रमांक २ पणदरे येथे १३, गट क्रमांक ३ सांगवी येथे ८, गट क्रमांक ४ खांडज-शिरवली येथे ७, गट क्रमांक ५ नीरावागज येथे १२, गट क्रमांक ६ बारामती येथे १५ व ब वर्ग संस्था मतदार संघासाठी १ मतदान केंद्र आहे. मतदारांना मतदान करताना ओळखपत्राची आवश्यक आहे, अशी माहिती निवडणूक निर्णय अधिकारी यशवंत माने, सहाय्यक निवडणूक निर्णय अधिकारी गणेश शिंदे यांनी दिली.

पॅनेल प्रमुखांना सूचना
‘माळेगाव’च्या प्रत्येक उमेदवारांना आपले दोन प्रतिनिधींची मतदान केंद्रावर नियुक्ती करण्यास मुभा दिली आहे. मतदान केंद्राच्या आवारात १०० मीटर क्षेत्रामध्ये प्रचार करण्यास परवानगी नाही. अंध व दिव्यांग वयोवृद्ध व्यक्ती व ज्यांना सोबतीची गरज भासल्यास कुटुंबातील एका व्यक्तीला केंद्रावर येण्यास मुभा देण्यात आली आहे. मतदारांना मतदान केंद्रावर येण्या जाण्यासाठी उमेदवारांनी वाहने उपलब्ध करून देऊ नयेत, मतदान केंद्रावर सीसीटीव्ही कॅमेरे लावलेले आहेत. याबाबत अनुचित प्रकार होणार नाहीत यांची खबरदारी घ्यावी. मतदान प्रतिदिनी त्याच गटाच्या मतदार यादीमधील असावा.

२५० पोलिसांचा बंदोबस्त
माळेगाव कारखाना निवडणूक निमित्ताने होणारी मतदान प्रक्रिया पारदर्शक व मुक्त वातावरणात होण्यासाठी प्रशासन सज्ज झाले आहे. माळेगाव, पणदरे, सांगवी, खांडज-शिरवली, निरावागज आणि बारामती या सहाही गटातील ६७ मतदान केंद्र असतील. या केंद्राच्या सुरक्षेच्या दृष्टीने व्हिडिओ कॅमेरा पथक कार्यान्वित असणार आहे. तसेच, शस्त्र बाळगण्यासही बंदी घालण्यात आली आहे. मतपेट्यांसह अधिकारी व कर्मचारी रविवारी रवाना झाले आहेत. तसेच, संबंधित मतदान केंद्राच्या सुरक्षेसाठी १२ पोलिस अधिकारी आणि तब्बल २३८ पोलिस कर्मचारी तैनात असणार आहेत, अशी माहिती उपविभागीय पोलिस अधिकारी डॉ. सुदर्शन राठोड यांनी दिली.