उधारीवर सिगारेट न दिल्याने चौघांवर कोयत्याने हल्ला

माळेगाव, ता. २१ : सांगवी (ता. बारामती) येथे उधारीवर सिगारेट न दिल्याचा राग मनात धरून चौघांनी पान टपरी व्यावसायिक व त्यांच्या नातेवाइकांवर कोयत्याने जीवघेणा हल्ला केला. मंगळवारी (ता.२०) सांगवी येथील एसटी बस स्थानक येथे ही धक्कादायक घटना घडली. या मारहाणीत प्रतीक सुनील जगताप, सुनील जयसिंग जगताप, सार्थक सुनील जगताप, उषा मानसिंग जगताप (रा. सांगवी) हे गंभीर जखमी झाले आहेत. याप्रकरणी जखमी प्रतीक सुनील जगताप (वय २४) यांनी माळेगाव पोलिस ठाण्यात चौघांविरुद्ध फिर्याद दिली आहे, त्यानुसार पोलिसांनी उपलब्ध फिर्याद व वैद्यकीय अहवालाच्या आधारे अभिषेक महादेव जगताप, महादेव विश्वनाथ जगताप, गीता महादेव जगताप, काजल महादेव जगताप (रा. सांगवी) यांच्यावर गुन्हा दाखल करण्यात आला आहे. पुढील तपास साहाय्यक फौजदार मोहिते करीत आहेत.