हजरत पीर राजे बागसवार उरूस यंदा रद्द

माळेगाव, ता. २० : दिवंगत उपमुख्यमंत्री अजित पवार यांच्या अकाली निधनामुळे माळेगावात (ता. बारामती) पुढील काही दिवस सण किंवा उत्सव साजरा न करण्याचा एकमुखी निर्णय गावकऱ्यांनी घेतला आहे. या निर्णयानुसार यंदाचा हजरत पीर राजे बागसवार यांचा होणारा पारंपरिक उरूस रद्द करण्यात आला आहे.
माळेगावातील सर्व समाजबांधव, भाविक भक्त आणि पंचक्रोशीतील नागरिकांनी या निर्णयाची नोंद घ्यावी, असे आवाहन करण्यात आले आहे. अनेक वर्षांची परंपरा असलेला हा उरूस गावाच्या एकोप्याचे आणि श्रद्धेचे प्रतीक मानला जातो. मात्र, दुःखाच्या याप्रसंगी आनंदोत्सव साजरा करणे उचित नसल्याची भावना माळेगावकरांनी व्यक्त केली.
उरुसाऐवजी केवळ धार्मिक विधी अत्यंत साध्या पद्धतीने पार पाडण्यात येणार असून कोणतेही सांस्कृतिक किंवा मनोरंजनाचे कार्यक्रम होणार नाहीत, अशी माहिती शिवराजसिंह लक्ष्मणसिंह राजे जाधवराव व गुलाब दिदअलीशाह फकीर (इनामदार) यांनी दिली.
दरम्यान, माळेगावच्या इतिहासात प्रथमच असा निर्णय घेण्यात आल्याने वातावरण भावनिक झाले आहे. ‘दुःखातही एकजूट’ हा संदेश देत माळेगावकरांनी संवेदनशीलतेचे दर्शन घडविले आहे.