अंधारबन पर्यटकांसाठी खुले करण्याची मागणी

माले, ता. ८ : मुळशी तालुक्‍याच्‍या पश्चिम पट्ट्यातील अंधारबन, कुंडलिका व्‍हॅली ही पर्यटनस्‍थळे पर्यटकांसाठी पुन्‍हा खुली करण्‍याची मागणी मुळशी तालुका राष्‍ट्रवादी कॉंग्रेसच्‍यावतीने करण्‍यात आली.
याबाबत राष्‍ट्रवादीच्‍या शिष्‍टमंडळाच्‍यावतीने प्रशासनास निवेदन देण्‍यात आले. जिल्‍हा बॅंकेचे उपाध्‍यक्ष सुनील चांदेरे, राष्‍ट्रवादी कॉंग्रेसचे तालुकाध्‍यक्ष अंकुश मोरे, बबन धिडे, माउली साठे, पंकज हरपुडे, सुखदेव मांडेकर, राजेंद्र डबडे, मोहन निकटे, नवनाथ चरवड, रोहिदास गोळे, अजय मारणे, रामदास गोळे, नितीन मोरे, संतोष ढोरे, संतोष कानगुडे, अनिल भोसले,योगेश मारणे संदीप बामगुडे, शंकर मराठे, लक्ष्मण कोंढेकर, जयवंत चोरघे, माउली पडवळ, राजेश आधवडे आदी उपस्थित होते. प्रशासनाच्‍यावतीने महसुल नायब तहसीलदार दर्शना सूर्यवंशी पाटील यांनी निवेदन स्‍वीकारले.
मुळशी तालुक्‍याच्‍या पश्चिम पट्ट्यात सुधागड अभयारण्‍याच्‍या हद्दीत अंधारबन जंगल व कुंडलिका दरीचा परिसर येतो. पावसाळी पर्यटनासाठी हा परिसर प्रसिद्ध आहे. त्‍यामुळे पावसाळ्यात मोठ्या संख्‍येने पर्यटक येतात. पर्यटकांना निवास, न्‍याहरी, जेवण, अशा विविध सुविधा स्‍थानिक ग्रामस्‍थ पुरवतात. त्‍यामुळे रोजगार मिळतो. पिंपरी, वांद्रे, निवे, घुटके, भांबर्डे, बार्पे आदी गावांच्‍या परिसरातील अनेकांनी याचे व्‍यवसाय सुरु केले आहेत. पाऊस, वन्‍यजीव अधिवासाला होत असलेली हानी,
पर्यटकांची अनियंत्रित गर्दी अशी कारणे देत वनविभागाने गुरुवारपासून (ता. ३) ही ठिकाणे पर्यटकांसाठी
बंदी केली आहेत. मात्र, पर्यटन बंद असल्‍यामुळे स्‍थानिकांचा रोजगार पूर्णपणे बंद झाला आहे. वनविभागाने तातडीने अंधारबन व कुंडलिका व्‍हॅली ही ठिकाणे पर्यटनासाठी खुली करावीत, अशी मागणी असल्‍याचे राष्ट्रवादीचे तालुकाध्‍यक्ष अंकुश मोरे यांनी सांगितले.