मुळशीत आजपासून महसूल सप्ताह उपक्रम

माले, ता. ३१ : मुळशी तालुक्यात १ ते ७ ऑगस्टदरम्यान ‘महसूल सप्ताह’ साजरा करण्यात येणार आहे, अशी माहिती मुळशीचे तहसीलदार विजयकुमार चोबे यांनी दिली.
१ ऑगस्ट रोजी महसुल सप्ताहाचा प्रारंभ महसूल दिनाने होणार आहे. विशेष कार्य केलेल्‍या कार्यरत, तसेच सेवानिवृत्त कर्मचाऱ्यांचा गौरव, लाभार्थ्यांना प्रमाणपत्रांचे वाटप व महसूल अधिनियमाच्या कलम १५५ अंतर्गत प्रकरणांची ऑनलाइन नोंद ई-हक्क पोर्टलवर केली जाणार आहे. २ ऑगस्ट रोजी २०११ पूर्वीच्या निवासी अतिक्रमणांना धोरणानुसार कायदेशीर रूप देत पात्र कुटुंबांना जागेचे पट्टे वितरित करणे. ३ ऑगस्टला पालकमंत्री शेत पाणंद रस्ते योजनेअंतर्गत पाणंद रस्‍ते अतिक्रमणमुक्ती मोहीम राबवून रस्‍त्‍याच्‍या दुतर्फा वृक्षारोपण करणे. ४ ऑगस्ट रोजी छत्रपती शिवाजी महाराज महाराजस्व अभियानांतर्गत विविध दाखले व ओळखपत्रांचे वाटप. आत्महत्याग्रस्त शेतकऱ्यांच्या वारसांना तातडीने मदत दिली जाणार आहे. ५ ऑगस्टला डीबीटी प्रक्रिया पूर्ण न झालेल्या लाभार्थ्यांच्या घरी जाऊन प्रक्रिया पूर्ण करणे, तसेच शिधापत्रिकांची केवायसी पूर्ण केली जाईल. ६ ऑगस्ट रोजी शासकीय जमिनींवरील अतिक्रमण निष्कासन करणे. शर्तभंग जमिनींबददल निर्णय घेणे.
७ ऑगस्टला एम-सॅंड धोरणाची अंमलबजावणी व सप्ताहाचा सांगता समारंभ होईल.