मुळशी धरण साठ्यात १.१८ टीएमसीने वाढ

माले, ता. १९ : मुळशी धरण परिसरात गेले काही दिवस मुसळधार पाऊस होत आहे. ताम्हिणी येथे चोवीस तासांत तब्‍बल ३२० मिलिमीटर पाऊस झाला आहे. या हंगामात आतापर्यंत ६८५३ मिलिमीटर एवढा मोठा पाऊस झाला आहे. त्‍यामुळे मुळशी धरणाच्‍या पाणीसाठ्यात मोठी वाढ झाली आहे. मुळशी धरण ९६.५० टक्‍के भरले आहे. धरणात १८.८४ टीएमसी एवढा साठा झाला आहे. धरणातील पाणीसाठ्यावर नियंत्रण ठेवण्‍यासाठी विसर्ग वाढवत मुळा नदीत २५ हजार क्‍यूसेकने नियंत्रित विसर्ग करण्‍यात येत आहे.
मुळशी धरण परिसरात सर्वदूर मुसळधार पाऊस होत आहे. ताम्हिणी, दावडी, माले, मुळशी, शिरगाव, आंबवणे आदी गावांच्‍या परिसरात ओढे, नाल्‍यांना पुर आला आहे. मुळशी धरणाच्‍या पाणी साठ्यात गेल्‍या चोवीस तासांत १.१८ टीएमसी पाणी साठ्याची वाढ झाली. गेले पंधरा दिवसांपासून विसर्ग बंद होता. परंतु धरणाच्‍या येवा क्षेत्रात मुसळधार पावसाचे प्रमाण वाढत असल्‍याने
धरणातील पाणीसाठ्यावर नियंत्रण ठेवण्‍यासाठी नियंत्रित विसर्ग सुरु करण्‍यात आला.
मुळशी धरण परिसरात मंगळवार (ता. १९) सकाळी मागील चोवीस तासांत झालेला पाऊस, कंसात या हंगामात आतापर्यंत झालेला एकूण पाऊस- ताम्हिणी- ३२० (६८५३), दावडी- २२५ (५२१३), शिरगाव- २१० (५४७०), आंबवणे- १९६ (४६८६), माले- ७३ (२५४८).