मांजरी खुर्द ग्रामपंचायतीवर अखेर प्रशासकाची नियुक्ती

मांजरी खुर्द, ता. ८ : गेली काही महिन्यांपासून येथील निम्म्याहून अधिक सदस्य पदाच्या जागा रिक्त असल्याने दैनंदिन प्रशासकीय कामात अडथळा येत होता. पुढील कार्यवाही होईपर्यंत हा अडथळा दूर करण्याच्या दृष्टीने मांजरी खुर्द ग्रामपंचायतीवर हवेली तालुका पंचायत समितीतील विस्तार अधिकारी जयश्री बेनके यांची प्रशासक म्हणून नियुक्ती केली आहे.
ग्रामपंचायतीच्या सरपंचासह येथील निम्म्यापेक्षा अधिक सदस्यांनी राजीनामा दिल्याने सरपंचपदाची निवडणूक लावता आली नाही. हे पद रिक्त असल्याने ग्रामपंचायतीच्या दैनंदिन कामकाजासह गावच्या विकास कामाला खो बसला होता. अनेक कामे सह्यांच्या अधिकाराअभावी रखडली होती. त्यामुळे गटविकास अधिकाऱ्यांकडून आपल्या अधिकारात या ग्रामपंचायतीवर प्रशासकाची नियुक्ती केली आहे.
सरपंचांचे सर्व अधिकार वापरून प्रशासकाला ग्रामपंचायतीचा कारभार चालवता येणार आहे. रखडलेली सर्व प्रशासकीय तसेच गावातील विकासकामांना गती मिळण्याचा मार्ग त्यामुळे मोकळा झाला आहे.