विद्युत मोटरींच्या चोरीचे शेतकरी हैराण

मोरगाव, ता. १३ : बारामती तालुक्याच्या पश्चिम भागात लोणी भापकर, तरडोली येथे विहिरीवरील विद्युत मोटर व केबल चोरीचे प्रकार सातत्याने होत असल्याने शेतकरी हैराण झाले आहेत. सातत्याने होत असलेल्या प्रकारामुळे केबल चोरी झाल्यानंतर आठ ते दहा हजारांचा भुर्दंड शेतकऱ्यांना पडत आहे.

लोणी भापकर येथून शुक्रवारी (ता. ११) शंभू महादेव मंदिराच्या शेजारी पहाटे तीनच्या सुमारास एका विहिरीतील विद्युत मोटर चोरट्यांनी काढली. मात्र त्याच वेळेस कामगार जागे झाल्याची चाहूल लागल्याने मोटरसोडून चोरट्यांनी पळ काढला.

तरडोली, बाबुर्डी, लोणी पाटी, लोणी भापकर येथील आठ शेतकऱ्यांच्या विहिरीवरील केबल जून महिन्यात चोरट्यांनी चोरून नेली. केबल चोरीचा प्रकार यापूर्वी चार वेळा झाल्याचे तरडोली येथील शेतकरी भानुदास जाधव यांनी सांगितले.यामुळे प्रशासनाने संबंधितांवर त्वरित कारवाई करावी अशी मागणी होत आहे.
लोणी भापकरचे पोलिस पाटील संजय गोलांडे म्हणाले की, केबल चोरीप्रकरणी बारवकर वस्ती येथे बारामती आमराईमध्ये राहणाऱ्या चार महिलांना जागृत नागरिकांनी पकडले होते. त्या महिलांनी केबल रिक्षात टाकल्याचे स्थानिक शेतकऱ्यांनी पाहिले पण रिक्षा वेगाने निघून गेली. शेतकऱ्यांनी त्या महिलांना पोलिसांच्या ताब्यात दिले. मात्र, पोलिसी खाक्या दाखवून चौकशी केली तरीही केबल चोरीची कबुली महिलांनी दिली नाही.
लोणी भापकर व तरडोली गावांच्या सीमेवर भाऊसाहेब जाधव यांचीही विद्युत मोटर व केबल चोरट्यांनी पाच महिन्यापूर्वी चोरून नेली. दरम्यान, भंगार व प्लास्टिक गोळा करण्याच्या निमित्ताने महिला ग्रुपने फिरत आहेत. मात्र, केबल चोरी करताना विहिरीत प्रत्यक्ष उतरून विद्युत मोटारच्या मुख्य जोडापासून केबल दाबाने उपसली जात आहे तर काही ठिकाणी कट्टरच्या साह्याने तोडली जात आहे.
तपासाची सूत्रे चालू असून शेतकऱ्यांनीही बारकाईने लक्ष ठेवून काही संशयित प्रकार आढळल्यास पोलिस ठाण्याशी संपर्क करावा, असे आवाहन वडगाव निंबाळकर पोलिस ठाण्याकडून करण्यात आले आहे.

सखोल चौकशीची मागणी
सहा महिन्यांपूर्वी लोणी भापकर येथील स्थानिक २० ते २२ वयोगटातील शेतकऱ्यांची मुले जुगारासाठी व स्वतःची चैन भागवण्यासाठी विद्युत मोटर चोरी करत असल्याचा प्रकार उघडकीस आला होता. परिसरात सध्या केबल चोरीच्या व विद्युत मोटर चोरीच्या प्रकारासंदर्भात पोलिसांनी सखोल चौकशी करावी व हे प्रकार थांबविण्यासाठी शेतकऱ्यांना मदत करावी अशी शेतकऱ्यांची मागणी आहे.

...