पुलाअभावी प्रवाहित कऱ्हा नदीतून चिमुकल्यांचा जीवघेणा प्रवास

पाण्यातून शाळा, पाण्यातूनच आयुष्य...
तरडोली, बाबुर्डी गावकऱ्यांची पुलासाठी आर्त हाक; प्रशासनाचे दुर्लक्ष

मोरगाव, ता. १८ : तरडोली आणि बाबुर्डी ही कऱ्हा नदीच्या किनारी विरुद्ध दिशेला वसलेली गावे आहेत. दैनंदिन कामकाजासाठी दोन्ही गावे एकमेकांवर अवलंबून आहेत. मात्र, दोन्ही गावांना जोडणारी यंत्रणा नसल्याने ग्रामस्थांना मोठ्या गैरसोयीचा सामना करावा लागतो. अनेकवेळा त्यांच्याकडून नदीवर पूल उभारण्याची मागणी करण्यात आली आहे. मात्र, प्रशासन त्याकडे जाणीवपूर्वक दुर्लक्ष करत असल्याचा आरोप नागरिकांकडून होत आहे.
नदीवर पुलाची व गावाच्या बाजूने संरक्षक भिंत उभारण्याची मागणी गेली अनेक वर्षांपासून होत आहे. यासंदर्भात ग्रामपंचायत मासिक सभा, ग्रामसभा यात ठराव करून तो जिल्हा परिषदेकडे पाठवण्यात आला आहे. मात्र, प्रशासनाकडून त्यास केराची टोपली दाखवली जात आहे. वर्षांनुवर्षे वारंवार मागणी करूनही कार्यवाही होत नसल्याने संतापाची भावना आहे. बाबुर्डी ग्रामपंचायतअंतर्गत असलेली खोमणे वस्ती, कोकरे वस्ती कऱ्हा नदीकाठी वसलेली आहेत. मुलांचे शिक्षण, दैनंदिन व्यवहार यासाठी येथील नागरिकांना तरडोली गावात जावे लागते. शालेय मुले, दुग्ध व्यावसायिक, महिला यांना पाण्याच्या प्रवाहामधून एकमेकांच्या मदतीने नदी पार करावी लागते. मुलांना शाळेत सोडविण्यासाठी अनेकवेळा पालकांना कामांच्या वेळापत्रकात बदल करावा लागतो. याशिवाय, चुकून थोडाफार उशीर झाल्यास मुलांना एकट्याने जावे लागते. काही वर्षांपूर्वी नदीच्या प्रवाहात दोन मुले वाहून गेल्याची घटना घडली होती. यातूनही धडा न घेता प्रशासनाकडून अद्यापही कार्यवाही करण्यात आलेली नाही. मोरगावला जाण्यासाठी नदी ओलांडून तरडोली येथून बारामती-मोरगाव मुख्य रस्त्याला यावे लागते. नाझरे जलाशयातून अतिरिक्त पाणी नदीपात्रात सोडल्यानंतर पाण्याचा वेग वाढतो. तसेच, पावसाळ्यात नदीला पाणी वाढते. त्याकाळात नागरिकांची मोठी गैरसोय होते. त्यामुळे संबंधित प्रशासनाकडून याची गंभीर दखल घेऊन पूल उभारण्याची मागणी बापू खोमणे, महेश खोमणे, बिरू कोकरे, संतोष खोमणे, सागर खोमणे यांनी केली आहे.