केवायसी अभावी खाती होणार ‘डेबिट फ्रिज’

मोरगाव, ता. २० : बारामती तालुक्यातील ग्रामीण भागात सहकारी बँकेसहित राष्ट्रीयकृत बँकेत शेतकरी व महिला बचत गटांची खाती आहेत. केवायसी नसल्यानंतर ती खाती डेबिट फ्रिज करण्यात येणार आहेत. यासंदर्भात बारामतीचे पुणे जिल्हा मध्यवर्ती बँकेचे विभागीय अधिकारी संदीप जगताप यांनी तालुक्यातील प्रत्येक शाखेत लेखी पत्राद्वारे केवायसी पूर्तता करून घ्यावी, अशा सूचना दिल्या आहेत.

ज्या शेतकरी व महिला बचत गटांची व वैयक्तिक खात्यांची केवायसी पूर्ण नाही अशांना एक महिन्याची मुदत केवायसी पूर्तता करण्यासाठी देण्यात आली आहे, अशी माहिती जगताप यांनी दिली.
वास्तविक ऑनलाइन प्रक्रियेत बचतीची वैयक्तिक खाती ज्यांची आहेत त्यांनी आधार कार्ड व पॅन कार्ड लिंक करणे आवश्यक आहे. तर शेतकरी व महिला बचत गट असणाऱ्यांनी गटाचे पॅन कार्ड तर गट चालवणाऱ्या प्रवर्तक, अध्यक्ष, सचिव यांचे आधार कार्ड व पॅन कार्ड लिंक करणे आवश्यक आहे.

बँकेच्या सीबीएस सॉफ्टवेअर मध्ये ही माहिती लिंक द्वारे अपडेट केली जाणार आहे. केवायसी अभावी खाते डेबिट फ्रिज झाल्यानंतर मोबाईल बँकिंग, यूपीआय, सीबीएस, एटीएम या सुविधांचा वापर ग्राहकांना करता येणार नाही. बारामती तालुक्यात पुणे जिल्हा मध्यवर्ती बँकेच्या एकूण 32 शाखा असून त्यामध्ये २९ शाखा या शेतीकर्ज व ग्रामीण भागाशी संलग्न आहेत.
तालुक्यात आत्मा अंतर्गत शेतकरी गट व महिला बचत गट यांची पीडीसीसी बँकेची संलग्नता ८००० पेक्षा जास्त आहे. अनेक गट खूप चांगल्या पद्धतीने चालले असून त्यांचे आर्थिक व्यवहार लाखोंच्या पटीत आहेत. मात्र, व्यवहारांअभावी बँकेत न येणाऱ्या खातेदारांचे व सक्रिय नसलेल्या बचत गटांचे केवायसी अभावी खाते डेबिट फ्रिज होण्याची परिस्थिती निर्माण होणार आहे.

खाते डेबिट फ्रिज केल्यानंतर पैसे भरता येणार आहेत मात्र पैसे काढता येणार नसल्यामुळे ग्राहकांसहित बचत गटातील सभासदांची मोठी गैरसोय होण्याची शक्यता आहे. खाते डेबिट फ्रिज केल्यानंतर ग्राहकांची व गटातील सभासदांची गैरसोय होऊ नये म्हणून बँकेकडून एक महिन्याची मुदत वाढ केवायसी पूर्तता करण्यासाठी देण्यात आली आहे.