जोगवडीत चार ठिकाणी घरफोडी

मोरगाव, ता. २० : जोगवडी (ता. बारामती) येथे शुक्रवारी (ता. १८) चार ठिकाणी चोरट्यांनी घरफोडी केली, मात्र त्या घरांमध्ये चोरीयोग्य मौल्यवान दागिने किंवा रोख रक्कम त्यांना मिळाली नाही.
याबाबत नागरिकांनी व पोलिस पाटील मोहिनी खोमणे यांनी माहिती दिली की, जोगवडी येथील शिवाजी भोसले हे कामानिमित्ताने पुण्याला गेले होते. त्यामुळे त्यांच्या घराला कुलूप होते. चोरट्यांनी कुलूप तोडून घरामध्ये प्रवेश केला. घरातील कपाट उघडून त्यातील साहित्यांची उचकापाचक केली. त्याच रात्री मुलाकडे मुंबईला गेलेले विलास भोसले यांच्याही घराचे कुलूप तोडून कपाटासह इतर ठिकाणी उचकापाचक करून साहित्य व कपडे अस्ताव्यस्त टाकले. याशिवाय येथील गणेश तोरवे व लक्ष्मण रुखे यांच्याही घरात चोरी करण्याचा प्रयत्न केला. त्यांच्या पाळीव कुत्र्याला चोरट्यांनी दगड मारून जखमी केले. कुत्र्यांच्या भुंकण्यामुळे पहाटे त्या परिसरातील नागरिक जागे झाले. त्याची चाहूल लागल्यामुळे चोरट्यांनी पलायन केले.
चारचाकी गाडीतून हे चोरटे आल्याची माहिती नागरिकांनी दिली. चारही ठिकाणी चोरी करण्याचा प्रयत्न केला गेला, मात्र त्या घरांमध्ये रोख रक्कम व इतर मौल्यवान काही सापडले नाही. त्यामुळे चोरट्यांचा चोरीचा प्रयत्न फसला. मात्र, गेल्या महिनाभरात लोणी भापकर, लोणी पाटी, तरडोली, बाबुर्डी येथे घरफोडी व चोरीचे प्रकार झाले आहेत. त्यात पुन्हा जोगवडीतील घटनेची भर पडली. एकाच रात्रीत घडलेल्या या घटनेमुळे जोगवडी व वाड्या वस्त्यांवरील नागरिकांमध्ये भीतीचे वातावरण पसरले आहे. नागरिकांनी सतर्क रहावे व रात्रीच्या वेळी आपापल्या भागात गस्त घालावी, असे आवाहन ग्रामपंचायतीकडून करण्यात आले आहे.
दरम्यान, दिवसा व रात्रीच्या वेळी गावात, सार्वजनिक ठिकाणी कोणीही संशयस्पद वाटल्यास पोलिसांशी संपर्क करावा, मात्र नागरिकांनी त्यास मारू नये. तत्काळ पोलिस पाटील व पोलीस ठाण्याची संपर्क करावा, असे आवाहन वडगाव निंबाळकर पोलिस ठाण्याचे सहाय्यक पोलिस निरीक्षक सचिन काळे यांनी केले.