मोरगावमध्ये होणार प्रशस्त भक्तनिवास

मोरगाव, ता. २८ : तीर्थक्षेत्र मोरगाव (ता. बारामती) येथे ग्रामीण विकास विभागाच्या ब वर्ग तीर्थक्षेत्र विकास योजनेतून येथे येणाऱ्या भाविकांसाठी प्रशस्त भक्तनिवास होणार आहे. यासाठी तीर्थक्षेत्र विकास योजनेतून दोन कोटी तीन लाख ६३ हजार रुपयांचा निधी मंजूर झाला आहे.
तीर्थक्षेत्र असल्यामुळे राज्याच्या विविध भागातून येथे भाविकांची सतत गर्दी असते. त्यामुळे येथे राहणाऱ्या भाविकांची संख्याही दिवसेंदिवस वाढत आहे. वाहन कराच्या माध्यमातून ग्रामपंचायतीला आर्थिक उत्पन्न मिळते. भक्त निवास झाल्यानंतर ग्रामपंचायतीच्या आर्थिक उत्पन्नात वाढ होण्यास मदत होणार आहे. तसेच, तीर्थक्षेत्रामधून झालेल्या भक्तनिवासामध्ये भाविकांना माफक दरात राहण्याची सुविधा मिळणार आहे. याच भक्तनिवासाच्या ठिकाणी स्वच्छतागृहासाठी ४२ लाख ६२ हजार रुपयांचा निधी मंजूर झाला आहे. बारामती पंचायत समितीच्या बांधकाम विभागाच्या नियंत्रणाखाली ही कामे होणार आहेत.
मोरगावमध्ये चिंचवड देवस्थान ट्रस्ट व इतर खासगी मालक यांचे विविध ठिकाणी भक्त निवास व राहण्याच्या सुविधा उपलब्ध आहेत. मात्र, अनेक चढा ओढीमुळे भाविकांकडून राहण्याच्या सुविधेसाठी जास्त रक्कम आकारली जाते. पर्यायी व्यवस्था नसल्यामुळे भाविकांना या सुविधेचा वापर करावा लागतो. भक्तनिवासाचे काम ग्रामपंचायतीने जागा निश्चित करून दिल्यानंतर वेळेत व दर्जेदारपणे पूर्ण करणार असल्याची माहिती बारामती पंचायत समितीच्या बांधकाम विभागाची शाखा अभियंता सुहास लडकत यांनी दिली.