तरडोली ग्रामपंचायतीकडून महिलांचा गौरव

मोरगाव, ता. ३ : ‘‘ग्रामीण भागातील विद्यार्थ्यांच्या सर्वांगीण गुणवत्ता वाढीसाठी गरज असलेल्या शालेय साहित्याचे वाटप करण्याचा तरडोली (ता. बारामती) ग्रामपंचायतीचा उपक्रम स्तुत्य आहे,’’ असे मत बारामती राष्ट्रवादी काँग्रेस पक्षाचे तालुकाध्यक्ष राजवर्धन शिंदे यांनी व्यक्त केले.
येथे उपमुख्यमंत्री अजित पवार यांच्या वाढदिवसानिमित्ताने विविध कार्यक्रमांचे आयोजन शनिवारी (ता. २) केले होते. यावेळी ते बोलत होते. याप्रसंगी जिल्हा परिषद शाळांना साहित्य वाटप, आरोग्य उपकेंद्रात साहित्य वितरण, गावठाण शाळेत शौचालय युनिट कामाचे भूमिपूजन, कर्तृत्ववान महिलांचा पुण्यश्लोक अहिल्यादेवी होळकर पुरस्कार, महिला आरोग्य तपासणी शिबिर, वृक्षारोपण, विद्यार्थ्यांना झाडे वाटप, अग्निरोधक यंत्र वाटप व प्रशिक्षण आदी कार्यक्रम झाले.
यावेळी पुणे जिल्हा परिषदेचे माजी अध्यक्ष विश्वास देवकाते, पुणे महानगरपालिकेचे घनकचरा व्यवस्थापन विभागाचे उपायुक्त संदीप कदम, संभाजी होळकर, दुर्योधन भापकर, सोमेश्वर साखर कारखान्याचे संचालक किसन तांबे, राहुल भापकर, बारामती पंचायत समितीच्या माजी सभापती अमृता गावडे आदी उपस्थित होते.
सरपंच अश्विनी गाडे, उपसरपंच नवनाथ जगदाळे, ग्रामपंचायत सदस्य महेंद्र तांबे, सागर जाधव, अनिता पवार, संतोष चौधरी, स्वाती गायकवाड, विद्या भापकर, नबाबाई धायगुडे, ग्रामपंचायत अधिकारी रूपाली मेहेत्रे आदींनी कार्यक्रमाचे नियोजन केले होते. प्रा. संतोष तांबे यांनी सूत्रसंचालन केले.

महिलांना पुण्यश्लोक अहिल्यादेवी होळकर पुरस्कार
काव्य गौरव पुरस्काराने सन्मानित लेखिका कवयित्री विद्या रमेश जाधव, महाराष्ट्र राज्य सरकारकडून महात्मा ज्योतिबा फुले जलमित्र पुरस्काराने सन्मानित सकाळच्या मोरगावच्या बातमीदार संगीता हनुमंत भापकर, शिवछत्रपती राज्य क्रीडा पुरस्कार विजेती क्रीडा अधिकारी रेश्मा शिवाजी पुणेकर यांना पुण्यश्लोक अहिल्यादेवी होळकर पुरस्कार २०२५ देऊन ग्रामपंचायतीकडून सन्मानित करण्यात आले.