ग्रामसेविकेकडून तरुणाला दमदाटी

मोरगाव, ता. २७ : लोणी भापकर (ता. बारामती) येथे ‘ॲनिमिया मुक्त गाव’ अभियान कार्यक्रमात ग्रामपंचायत कार्यालयात गटविकास अधिकाऱ्यांसमोर समस्या सांगण्यासाठी उभा राहिलेल्या तरुणाला ग्रामसेविकेने, ‘तुला कानशिलात मारीन’ असे म्हटले. याबाबत संबंधित ग्रामसेविकेवर शिस्तभंगाची कारवाई करावी, यासाठी ग्रामपंचायत कार्यालयासमोर बुधवारपासून (ता. २६) धरणे आंदोलन सुरु केले आहे.
याबाबत आंदोलन करत असलेल्या मनोज साठे या तरुणाने सांगितले की, ‘ॲनिमिया मुक्त गाव’ अभियान कार्यक्रमात मी विचारलेल्या सरळ प्रश्नाने चिडलेल्या ग्रामसेविकेने, ‘तुला कानशिलात मारीन. इथून निघून जा,’ अशा प्रकारचे दबावाचे सूर काढले. या प्रकाराची माहिती जिल्हा परिषदेचे मुख्य कार्यकारी अधिकारी, बारामती पंचायत समितीचे गटविकास अधिकारी आणि पोलिस प्रशासन यांना लेखी तक्रार सादर केली आहे. ग्रामसेविकेवर तत्काळ शिस्तभंगाची व निलंबनाची मागणी केली होती. परंतु, कोणतीच कारवाई न झाल्याने आपण हे आंदोलन सुरू केले आहे.
यासंदर्भात बारामतीचे गटविकास अधिकारी किशोर माने म्हणाले, ‘‘तक्रारदार, ग्रामपंचायत अधिकारी, ग्रामपंचायत पदाधिकारी यांची झालेल्या प्रकारावरून एकत्रित चर्चा घेतली होती. या प्रकरणात वस्तुस्थितीनुसार सखोल चौकशी करून योग्य ती कारवाई केली जाईल.’’
दरम्यान, याबाबत ग्रामसेविका उज्ज्वला शिंगाडे यांच्याशी संपर्क साधला असता त्यांनी फोन उचलला नाही. त्यामुळे त्यांच्याशी संपर्क होऊ शकला नाही. .