लोणी भापकर येथे बाजार ओट्यांची मागणी

मोरगाव, ता. ७ : ऐतिहासिक वारसा असलेल्या बारामती तालुक्यातील लोणीभापकर गावाची लोकसंख्या ५००० हजारपेक्षा जास्त असून, येथे प्रशस्त जागेअभावी येथील आठवडे बाजार रस्त्यावर भरत आहे. ग्रामपंचायतीने प्रशस्त जागा व बाजारओटे, बाजार तळावरील सोयीसुविधा याकडे लक्ष द्यावे व हा प्रश्न सोडवावा, अशी मागणी नागरिकांमधून होत आहे.
गेली अनेक वर्षांपासून येथील आठवडे बाजार श्री भैरवनाथ मंदिरासमोर रस्ता व मुख्य रस्त्यावर भरत आहे. त्यामुळे एकीकडे रस्त्यावरील गर्दी, बेशिस्तपणे लावलेली वाहने यामुळे वाहतुकीची कोंडी होत आहे, तर दुसरीकडे ३० किलोमीटर अंतराच्या आतील अनेक व्यावसायिक व शेतकरी येथे मालविक्रीसाठी येतात. मात्र, बाजारओटे नसल्यामुळे त्यांची मोठी गैरसोय होत आहे.
बाजार भरत असलेल्या परिसरात ठिकठिकाणी चारचाकी, दुचाकी लावल्यामुळे गाड्या काढताना वादाचे प्रसंग निर्माण होतात. अपुरी जागा, वाहनतळाची गैरसोय, प्रसाधनगृह व इतर सुविधांचा अभाव यामुळे येथे नागरिकांबरोबर शेतकरी आणि व्यावसायिक यांची पण गैरसोय होते.
मात्र, बाजारतळ, बाजारओटे, सोयी सुविधा केल्यानंतर ग्रामपंचायतीचे उत्पन्न वाढण्यास भरीव मदत होणार आहे. त्यामुळे ग्रामनिधी किंवा सामाजिक बांधिलकीतून दानशुरांकडून जागा उपलब्ध करून हा विषय सोडवावा, अशी नागरिकांची मागणी आहे.

03445