वाहनाच्या धडकेत सांबराचा मृत्यू

महाळुंगे पडवळ, ता. ३ : आंबेगाव तालुक्यातील कळंब-वर्पेमळा परिसरात पुणे-नाशिक महामार्गावर शुक्रवारी (ता. ३) सकाळी अज्ञात वाहनाच्या धडकेत सांबर या वन्य प्राण्याला गंभीर दुखापत झाल्यामुळे ते मृत्युमुखी पडले.
कळंब येथील वर्पेमळा येथून जाणाऱ्या पुणे-नाशिक महामार्गावर शुक्रवारी पहाटेच्या दरम्यान अज्ञात वाहनाच्या धडकेत सांबर हा वन्यप्राणी गंभीर जखमी झाल्याची माहिती स्वप्नील भालेराव यांनी वनपाल शशिकांत मडके यांना दिली. तत्काळ वन विभागाचे कर्मचारी व रेस्क्यू सदस्य घटनास्थळी हजर होऊन जखमी सांबर या वन्य प्राण्याला उपचारासाठी घेऊन जात असताना त्याचा मृत्यू झाली.
दरम्यान, कळंब वन विभाग परिसरात बिबट्याचे मोठ्या प्रमाणावर नागरिकांना दर्शन होत असते. त्याचबरोबर अनेक पाळीव जनावरांवर हल्ले देखील बिबट्याने केलेले आहेत. मात्र, सांबर हे वन्यप्राणी या परिसरात पहिल्यांदाच आढळून आले होते. मात्र, या सांबराच्या मृत्यूने या परिसरातील नागरिकांनी हळहळ व्यक्त केली.वन खात्याच्या कर्मचाऱ्यांनी पंचनामा करून त्याचा दफनविधी केला.