युरोपियन युनियनकडून तोंडली बागेची पाहणी

महाळुंगे पडवळ, ता.७ : चांडोली बुद्रुक (ता. आंबेगाव) येथील शेतकरी रमेश देवराम थोरात यांनी पिकविलेल्या तोंडली बागेला युरोपियन युनियनचे प्रतिनिधी कॉर्न कोलीस आणि डारा ओशिया यांनी भेट दिली.
भेटीदरम्यान भारतातून युरोपियन युनियन देशांना पाठविण्यात येणाऱ्या तोंडली उत्पादनाचे लागवड व्यवस्थापन व अवशेष मुक्त पद्धतीचे काटेकोर पालन होते की नाही, याची प्रत्यक्ष शेतात जाऊन पाहणी केली.
पीक पाहणी दौऱ्यात युरोपियन युनियन प्रतिनिधी, प्रशांत वाघमारे, डॉ. अन्सारी, मिथुन धुमाळ, कृषी अधिकारी सुनील गिराम, मंडळ कृषी अधिकारी सोपान लांडे, शिवानंद बिराजदार, कृषी सहाय्यक साधना गंधट, तसेच खुशी इंटरनॅशनल कंपनीचे प्रतिनिधी संतोषकुमार हुले उपस्थित होते.

यावेळी शेतकरी रमेश थोरात व कृषी सहाय्यक साधना गंधट यांच्याशी सविस्तर चर्चा करून पथकाने सखोल माहिती घेतली. पारंपरिक महाराष्ट्रीय पद्धतीने पाहुण्यांचा सत्कार व सन्मान करण्यात आला.

पॅकिंग व निर्यात प्रक्रियेची तपासणी
लागवड, बागेचे व्यवस्थापन, स्वच्छता, कीड-रोग नियंत्रण, विशेषतः फळमाशी नियंत्रण, फळांची तोडणी, पॅकिंग व निर्यात प्रक्रिया अशा सर्व टप्प्यांची तपासणी केली. तोंडली उत्पादनासाठी ठरवलेल्या जागतिक दर्जाच्या कठोर नियमावलीचे पालन होते की नाही याची खात्री पथकातील सदस्यांकडून करण्यात आली.

भेट तोंडलीसारख्या परदेशात निर्यात होणाऱ्या पिकांच्या दर्जात्मक व सुरक्षित उत्पादनासाठी शेतकऱ्यांकडून होणाऱ्या प्रयत्नांना आंतरराष्ट्रीय स्तरावर मिळालेली महत्त्वपूर्ण पावती ठरली.
- सुनील गिराम, कृषी अधिकारी
03003