महाळुंगे येथे बंद घरातून दोन लाखांचा ऐवज चोरी

महाळुंगे पडवळ, ता. ८ : आंबेगाव तालुक्यातील आवटेमळा- महाळुंगे पडवळ येथे बंद घराचा कडीकोयंडा तोडून रोख रक्कम व सोन्या-चांदीचे दागिने, असा एकूण एक लाख ८८ हजार रुपयांचा ऐवज चोरून नेला.
सुभाष आत्माराम पडवळ यांचे आवटेमळा रस्त्यालगत घर आहे. मुले पुण्याला असल्याने ते कधी गावी, तर कधी पुण्याला राहतात. सोमवारी (ता. ५) रात्री १० ते मंगळवारी (ता. ६) पहाटे ६ वाजण्याच्या दरम्यान घरफोडी झाली असल्याचा संशय पडवळ यांनी व्यक्त केला. पोलिस पाटील सविता पडवळ व मंचर पोलिस ठाण्याचे हवालदार बी. वाय. गर्जे आणि एस. व्ही. फुलवडे यांनी भेट देऊन पंचनामा केला.
चोरट्यांनी बंद घराचा कडी कोयंडा आणि कुलूप तोडून घरात प्रवेश केला. कपाटातील ६३ हजार रुपये रोख रक्कम, ५० हजारांची सोन्याची अंगठी, २५ हजाराची कानातील वेल, १० हजार रुपयांची सोन्याची नथ, ४० हजार रुपये किमतीची चांदीची साखळी व चांदीच्या पट्ट्या, असा एकूण एक लाख ८८ हजार रुपयांच्या मुद्देमाल चोरून नेला आहे. याबाबत सुभाष पडवळ यांनी मंचर पोलिस ठाण्यात फिर्याद दाखल केली. चोरट्यावर गुन्हा दाखल केला आहे.