महाळुंग्यात अपघातानंतर ग्रामस्थांनी रोखला महामार्ग

महाळुंगे पडवळ, ता. ७ : पुणे- नाशिक राष्ट्रीय महामार्गावर आंबेगाव तालुक्यातील एकलहरे आणि कळंब येथे तीन दिवसांत गतिरोधक बसवावेत. राष्ट्रीय महामार्ग प्राधिकरणाचे या भागातील काम करणाऱ्या ठेकेदारावर गुन्हा दाखल करावा, आदी मागण्या करत महाळुंगे पडवळ, एकलहरे आणि कळंब येथील ग्रामस्थानी महामार्ग रोखून धरला. आंदोलकांच्या भावना तीव्र होत्या.
पुणे- नाशिक राष्ट्रीय महामार्गावर एकलहरे येथील चौकात शुक्रवारी (ता. ६) रात्री मोटारसायकलवरून रस्ता ओलांडत असताना भरधाव बसची जोरदार धडक बसल्याने रूपाली प्रणल पडवळ (वय ३३) यांचा जागीच मृत्यू झाला. तर, अक्षय हनुमंत पडवळ (वय २२, दोघेही रा. महाळुंगे पडवळ) हे गंभीर जखमी झाले आहेत. त्यानंतर शनिवारी (ता. ७) सकाळी महाळुंगे पडवळ, एकलहरे आणि कळंब येथील ग्रामस्थ संतप्त झाले. जिल्हा परिषदेचे माजी सदस्य प्रमोद कानडे, हुतात्मा बाबू गेनू युवा प्रतिष्ठानचे अध्यक्ष बाबाजी चासकर, अनिल पडवळ, मिलिंद शिंदे, यादव चासकर, शिवाजी भालेराव, दीपक चिखले, संतोष डोके, प्रदीप शिंदे, स्वप्नील डोके, दिलीप काळे, रीना डोके, बाळासाहेब शिंदे, हेमंत पडवळ, देविदास डोके, पोलिस पाटील सुमन फलके यांच्यासह पंचक्रोशीतील ४० ते ५० ग्रामस्थांनी महामार्गावर रूपाली पडवळ यांचा मृतदेह असलेली रुग्णवाहिकेसह आंदोलन केले.
दरम्यान, वारंवार मागणी करूनही गतिरोधक बसविले जात नाही. भुयारी मार्गही केला जात नाही. अपघातात मृत्युमुखी पडलेल्यांना जबाबदार कोण? येत्या दहा दिवसांत खासदार, आमदार, प्रशासकीय अधिकारी, राष्ट्रीय महामार्ग प्राधिकरणाचे अधिकारी आणि कळंब, एकलहरे, महाळुंगे पडवळ आदी गावातील ग्रामस्थांची एकत्रित बैठक घ्यावी, अशी आग्रही मागणी आंदोलनकर्त्यांनी केली.
मंचर पोलिस ठाण्याचे साहाय्यक पोलिस निरीक्षक सुनील बडगुजर आणि राष्ट्रीय महामार्ग प्राधिकरणाचे मंचरचे उपअभियंता अरुण चौधरी यांनी आंदोलनकर्त्यांचे म्हणणे ऐकून घेत बैठकीचे आणि गतिरोधक बसविण्याचे आश्वासन दिले. त्यानंतर आंदोलन मागे घेण्यात आले. खोळंबलेली वाहतूक मंचर पोलिसांनी सुरळीत सुरू केली.