कळंबला चार टन निर्माल्य संकलन

महाळुंगे पडवळ, ता. ७ : कळंब (ता. आंबेगाव) येथील विसर्जन घाटावर कळंब ग्रामपंचायत, मंचर रोटरी क्लब आणि मंचर पोलिस ठाण्याच्या संयुक्त विद्यमाने निर्माल्य संकलन करण्यात आले. जवळपास चार टन निर्माल्य गोळा केल्याची माहिती कळंब ग्रामपंचायत आणि मंचर रोटरी क्लबच्या पदाधिकाऱ्यांनी दिली.
गणपती उत्सव साजरा करत असताना १० दिवसांच्या कालावधीत गणपतीच्या पूजेसाठी वापरलेले साहित्य नंतरच्या काळात निर्माल्य मोठ्या प्रमाणात साचत असते. तालुक्यातील जवळपास अडीच हजार गणेश मूर्तीचे कळंब येथे विसर्जन होते. त्यांचेही निर्माल्य जमा होते. तसेच गणपती विसर्जन करताना भाविक हे निर्माल्य नदीपात्रात टाकतात, त्यामुळे नदीतील पाण्याचे प्रदूषण वाढते. ही बाब टाळण्यासाठी कळंब ग्रामपंचायत आणि मंचर रोटरी क्लब गेली अनेक वर्षापासून निर्माल्य संकलन करत आहे. निर्माल्य घंटागाडीत आणि ट्रॅक्टर ट्रॉलीमध्ये टाकण्याबाबत नागरिकांमध्ये जनजागृती केल्याने जवळपास चार टन निर्माल्य गोळा झाले, असे उद्योजक नितीन भालेराव यांनी सांगितले.
यावेळी या उपक्रमाला उपविभागीय पोलिस अधिकारी अमोल मांडवे, पंचायत समितीच्या माजी सभापती उषा रमेश कानडे, पुणे जिल्हा परिषद सदस्य प्रमोद कानडे, सरपंच उषा सचिन कानडे आणि उपसरपंच गोकूळ भालेराव यांच्यासह विविध मान्यवरांनी भेटी दिल्या.
निर्माल्य गोळा करण्याचे काम कळंब ग्रामपंचायतीचे कर्मचारी आणि मंचर रोटरी क्लबचे अध्यक्ष ज्ञानेश्वर चव्हाण, अभियंता बाळासाहेब पोखरकर, आदिनाथ थोरात, जनार्दन मेंगडे, मयूर पारेख, प्रा. विलास फसाले, डॉ. विवेक फसाले यांनी केला. घाटावर कोणताही अनुचित प्रकार घडू नये म्हणून मंचर पोलिस ठाण्याचे पोलिस निरीक्षक श्रीकांत कंकाळ यांच्या मार्गदर्शनाखाली पोलिस बंदोबस्त तैनात करण्यात आला होता.