साकोऱ्यात गाई, वासरांना लापशी

महाळुंगे पडवळ, ता. १७ : साकोरे (ता.आंबेगाव) येथे वसुबारस सणानिमित्त भैरवनाथ गोशाळेतील गाई आणि वासरांना मोढवे आणि लोहोटे कुटुंबीयांनी लाफशीचा आहार दिला. गेल्या नऊ वर्षापासून ही परंपरा सुरू आहे.
साकोरे येथे माजी सरपंच अशोकराव मोढवे, विजय लोहोटे व गणपत लोहोटे यांनी गीर गाईंचा भैरवनाथ गोशाळा गोठा उभारला आहे. त्यात ५० गाई आणि १५ वासरे आहेत. शुक्रवारी (ता.१७) सायंकाळी अश्विनी अशोक मोढवे, संध्या विजय लोहोटे, सुमन गणपत लोहोटे, सुनंदा चासकर यांनी गाईचे पूजन केले. “हिंदू धर्मात गायीला माता म्हणजेच आईचा दर्जा दिला आहे. दिवाळीतील पहिला सण म्हणजे वसूबारस. या दिवशी घरात लक्ष्मीचे आगमन व्हावे तसेच भरपूर कृषी उत्पादन व्हावे, आपल्या मुला-बाळांना चांगले आरोग्य मिळावे आणि सुख लाभावे म्हणून गाई आणि वासरांची पूजा केली जाते,’’ असे भैरवनाथ गोशाळेचे संचालक अशोकराव मोढवे यांनी सांगितले.

03405