माळशिरसला पावसामुळे फूल शेती कोमेजली

माळशिरस, ता.१५: पुरंदर तालुक्यातील पूर्व भागातील माळशिरस परिसरातील गावांमध्ये मागील चार दिवसांपासून जोरदार पाऊस दररोज होत असल्याने या भागात घेतले जाणाऱ्या फूल पिकांचे मोठ्या प्रमाणात नुकसान झाले आहे. यामुळे फूल उत्पादक धास्तावले आहेत.
तालुक्यातील पूर्व पट्ट्यातील राजेवाडी, वाघापूर , माळशिरस, टेकवडी, आंबळे, पोंढे या भागात मोठ्या प्रमाणावर फूल शेती केली जाते. या भागात दरवर्षी होत असलेल्या मध्यम स्वरूपाच्या पावसावर उत्तम दर्जाची फूल शेती होती. यामुळेच येथील फुलांना पुणे-मुंबई सह परराज्यातील विक्रेत्यांकडून मोठी मागणी असते. यंदा मात्र उन्हाळ्याच्या शेवटी जोरदार झालेल्या व खरिपाच्या सुरुवातीलाच मागील तीन-चार दिवसांपासून दररोज होत असलेल्या जोरदार पावसामुळे या भागातील फूल शेती सध्या अडचणीत आली आहे.
पालखी सोहळ्याच्या मुहूर्तावर व त्यानंतर येणाऱ्या श्रावण महिन्यात फुले बाजारात आणण्यासाठी या भागातील शेतकरी अलीकडील काही दिवसांपासून फूल शेती करून हंगामाच्या अगोदर फुले बाजारात आणतात. नेहमीप्रमाणे ही फुले तोडणी योग्य होऊन सध्या बाजारात विक्री योग्य झाली आहेत. मात्र सध्या होत असलेल्या सततच्या पावसामुळे ही फुले खराब होऊ लागली आहेत.

लाखो रुपयांचे होणार नुकसान
सततच्या पाण्यामुळे फुलांची झाडे मुळ्या सडू लागल्याने उन्मळून पडत आहे. फुलांचा फड डोळे देखत खराब होऊ लागल्याने फूल उत्पादक धास्तावले असून त्यांचे लाखो रुपयांचे यामुळे नुकसान होणार आहे. त्याचप्रमाणे गणपती दसरा नवरात्र उत्सवासाठी देखील मागील महिन्याभरापूर्वी लागवड केलेली शेवंतीवर्गीय फुलांची अवस्था देखील याहून वेगळी नाही. ही फुलांची झाडे देखील सततच्या पावसाने खराब होऊ लागली असून पुढील काही दिवस असाच पाऊस राहिल्यास यंदा या भागातील फुले पुढील काळात बाजारात दिसतील का नाही असे चित्र सध्या निर्माण झाले आहे.

फुलशेतीला लागवडी अगोदर मशागत, सेंद्रिय खते ,रासायनिक खते, ठिबक, रोपांसाठी होणारा मोठ्या प्रमाणावरील खर्च पाहता फूल उत्पादकांचे एक वर्ष वाया गेल्यास त्याचा मोठा परिणाम पुढील काळातील त्याच्या उत्पादनावर निश्चित पाहावयास मिळतो.
रामदास वाघले, फूल उत्पादक

02438