''माळशिरस परिसरातील विजेच्या समस्या सोडवा''

माळशिरस, ता. ४ : पुरंदर तालुक्यातील माळशिरस गणातील गावांमध्ये विजेच्या समस्यांबाबत असणाऱ्या अडचणी सोडवून आवश्यक त्या ठिकाणी नवीन रोहित्र (ट्रान्सफॉर्मर) बसविण्याची मागणी पंचायत समितीचे सदस्य माऊली यादव यांनी महावितरणच्या अधिकार्यांकडे केली आहे. महावितरणचे कार्यकारी अभियंता भालचंद्र गवई यांना बुधवारी (ता. ४) माऊली यादव यांनी भेटून माळशिरस, राजूरी, पिंपरी, मावडी सुपे, नायगाव, रिसे, पिसे, पोंढे, पांडेश्वर, नाझरे सुपे, नाझरे कडेपठार, रानमळा, कोथळे, धालेवाडी या गावांमध्ये वाढत्या वीज लोडमुळे शेतकऱ्यांना वीजपुरवठ्याच्या अडचणी निर्माण होत होत्या. या पार्श्वभूमीवर १५ ठिकाणी १०० के व्ही के क्षमतेचे रोहित्र वाढविणे तसेच ७ ठिकाणी नवीन रोहित्र बसविणे, नवीन फ्यूज बॉक्स बसविणे, लाइन झोळ काढणे याबाबत निवेदन देऊन मागणी केली आहे.