देवघर येथे पाणंद रस्ता वाहतुकीस खुला

महुडे, ता.१२ : निगुडघर महसूल मंडलातील देवघर (ता.भोर) येथील अतिक्रमित झालेले दोन पाणंद रस्ते भोर प्रशासनाकडून खुले करण्यात आले. त्यामुळे शेतकऱ्यांना व जनावरांना तसेच इतर शेती कामासाठीच्या वाहतुकीस आता हा रस्ता खुला झाला आहे.

देवघर येथील सरकारी जमिनीवर अतिक्रमण करून पूर्वीपासून असलेला वहिवाट रस्ता बंद केला होता. तसेच गावाच्या खालच्या बाजूकडील जुना पाणंद रस्ता अतिक्रमित झाला होता. जिल्हाधिकारी यांच्या आदेशानुसार पाणंद रस्ते व शीव रस्ते खुले करण्याच्या अभियानामुळे भोरचे उपविभागीय अधिकारी डॉ. विकास खरात, तहसीलदार राजेंद्र नजन यांच्या मार्गदर्शनाखाली नायब तहसीलदार आजिनाथ गाजरे, निगुडघरच्या मंडल अधिकारी रूपाली गायकवाड यांच्या उपस्थितीत देवघरमधील दोन्ही अतिक्रमित रस्त्यांपैकी एक गुरुवारी (ता.६) व दुसरा मंगळवारी (ता.११) ७५० मीटर खुले करण्यात आला.
यावेळी सरपंच मंगल कंक, ग्रामसेवक सुहास गायकवाड, ग्राम महसूल अधिकारी विकास कारळे, रवींद्र बेंद्रे, शेखर शिनगारे, मंगेश चंदेले, पोलिस पाटील निवृत्ती साळेकर, उपसरपंच नामदेव कंक आदींसह ग्रामस्थ उपस्थित होते.
01632