ओढ्यातील बाह्यवळण रस्ता धोकादायक

हिर्डोशी, ता. ३० : भोर महाड रस्त्याच्या रुंदीकरणाचे काम सुरू असून या रुंदीकरणासाठी भोर तालुक्यात जागोजागी असणाऱ्या जुन्या मोऱ्या आणि पूल पाडून त्या ठिकाणी नवीन मोऱ्या व पूल बांधण्यात येणार आहेत. सध्या भोर वेनवडी दरम्यानच्या मांगीरीच्या ओढ्यावरील पूल पाडून तेथे नवीन पूल बांधण्याचे सुरु असलेले काम संथगतीने होत असून रहदारीसाठी ओढ्यातून केलेला बाह्यवळण रस्ता पावसात पाण्याखाली जाण्याची शक्यता असल्याने धोक्याचा आहे.
पुलाचे अपूर्ण असून ते पावसाळ्यापूर्वी पूर्ण होण्याची शक्यता कमीच आहे. पावसात वाहतूक नियमीत सुरु राहण्यासाठी योग्य त्या उपाययोजना करणे गरजेचे आहे. अन्यथा भर पावसात भोर महाड मार्गावरील तसेच आंबवडे खोऱ्यातील गावांचा संपर्क तुटण्याची शक्यता आहे. पंढरपूर-महाड राष्ट्रीय महामार्गाच्या भोर तालुक्यातील वरंधा घाट ते शिंदेवाडी फाटा (ता. खंडाळा जि.सातारा) या रस्त्याच्या कामासाठी सुमारे ७२३ कोटी रुपये निधी मंजूर असून रुंदीकरणाचे काम आठ महिन्यांपासून सुरु आहे. रस्त्याकडेची झाडे तोडण्यात आली आहेत. वडगाव येथील लहान पुलाचे काम अपूर्णच आहे. भोर ते वेनवडी मांगीर ओढ्यापर्यंत सहा महिन्यांपासून खोदकाम करून ठेवले आहे. वेनवडी, आंबेघर हद्दीत तसेच देवघर ते वारवंड पर्यंत रस्त्याचे व मोऱ्यांसाठीचे खोदकाम करून ठेवले आहे. हीच कामे अपूर्ण असताना देवघर ठिकाणी दोन्ही बाजूच्या साइडपट्ट्या खोदून ठेवल्याने रस्ता अरुंद आणि धोकादायक बनला आहे. वेणुपुरी ते कोंढरी स्मशानभूमीपर्यंत रस्त्याच्या एका बाजूचे काँक्रिटीकरणाचे काम केले असून रहदारीस खुला नाही. बाजूच्या कच्च्या तर इतर ठिकाणी मातीच्या रस्त्यातून अपूर्ण असलेल्या कामाच्या ठिकाणाहून धोकादायक पद्धतीने वाहतूक सुरु आहे. रखडलेली कामे तातडीने मार्गी लावण्याची मागणी स्थानिकांकडून होत आहे.
भोरचे आमदार शंकर मांडेकर यांनी ८ मे रोजी वेनवडी जवळील पुलाची पाहणी केली होती. त्यावेळी अधिकारी व ठेकेदारांना पुलाचे काम तातडीने पूर्ण करण्याचे तसेच जागोजागी खोदलेल्या मोऱ्यांच्या ठिकाणची माती काढून तेथे सिमेंट काँक्रिट टाकून रस्ता सुस्थितीत करण्याच्या सूचना दिल्या होत्या. परंतु वीस दिवस होऊनही पुलाचे काम संथगतीनेच सुरु आहे. हिर्डोशी भागात चिखलमय रस्ता, मोऱ्यावरुन जाता-येता वाहन चालकांना कसरत करावी लागत आहे.