रायरेश्‍वर पायीवारीचे गुरुवारी होणार प्रस्थान

हिर्डोशी, ता. १६ : भोर तालुक्यातील रायरेश्‍वर धर्मादाय संस्थेमार्फत सुरू केलेल्या रायरेश्‍वर ते पंढरपूर पायी वारी सोहळ्याला किल्ले रायरेश्‍वर (ता. भोर) येथून बुधवारी (ता. १८) सुरुवात होणार असून गुरुवारी रायरेश्‍वर येथून प्रस्थान होणार आहे.
भोरचे दिवंगत माजी आमदार संपतराव जेधे यांनी सुरु केलेल्या रायरेश्‍वर पायीवारीला तीन तपाची परंपरा असून यावर्षी ४७ वे वर्षे आहे. रायरेश्‍वर वारीत हिरडस मावळ, आंबावडे खोऱ्यासह तालुक्यातील वारकरी दरवर्षी पंढरपूरपर्यंत पायी प्रवास करतात. यावर्षी १८ जूनला वारकरी रायरेश्‍वर येथे पहिला मुक्काम करणार असून गुरुवारी रायरेश्‍वर मंदिरात वीणा पूजन करून वारीचे प्रस्थान होणार आहे. त्यानंतर आंबवडे, भोर, विंग, पिसाळवाडी, दापकेघर, वारवंड पुनर्वसन, फलटण, माझेरी पुनर्वसन, वाजेगाव, मोरोची, सदाशिव नगर, विंझोरी, वेळापूर, कुरोली, वाखरी व पंढरपूर येथे तीन असे १९ मुक्काम होणार आहेत. तर ७ जुलैला एकादशी सोडून वारीचा परतीचा प्रवास भोरकडे होणार आहे. अशी माहिती वारीचे व्यवस्थापक बाळासाहेब सोनवणे व सहकार्याध्यक्ष नितीन जेधे यांनी दिली.